Аляксандр Станіслававіч Данілевіч
Аляксандр Станіслававіч Данілевіч (нар. 30 лістапада 1974) — беларускі юрыст. Кандыдат юрыдычных навук, дацэнт.
| Аляксандр Станіслававіч Данілевіч | |
|---|---|
| Дата нараджэння | 30 лістапада 1974 (49 гадоў) |
| Род дзейнасці | юрыст |
| Месца працы | |
| Навуковая ступень | кандыдат юрыдычных навук |
| Навуковае званне | |
| Альма-матар |
|
Біяграфія правіць
Скончыў юрыдычны факультэт БДУ ў 1996 г. З 1996 года працуе ў сістэме адукацыі, з 2003 года на факультэце міжнародных адносін БДУ. У 2005 г. абараніў кандыдацкую дысертацыю на тэму «Рашэнне міжнароднага арбітражнага суда», у гэтым жа годзе Вышэйшы атэстацыйны камітэт Рэспублікі Беларусь прысвоіў А. С. Данілевічу навуковае званне «дацэнт». У 2005 г. уключаны ў рэкамендацыйны спіс арбітраў Міжнароднага арбітражнага суда пры БелГПП, выбраны арбітрам[1].
Практыкуючы адвакат, член Мінскай гарадской калегіі адвакатаў[1].
З пачаткам ваеннага ўварвання Расіі ва Украіну ў 2022 годзе падпісаўся пад антываенным зваротам адвакатаў і юрыстаў. За гэта атрымаў ад калегіі адвакатаў вымову, бо быццам бы «парушыў прафесійную этыку адваката», падпісаўшы зварот. Таксама з ім не працягнуў кантракт БДУ[2].
21 траўня 2022 года затрыманы і адпраўлены ў СІЗА КДБ. 10 красавіка 2023 года Данілевічу прызначылі 10 гадоў пазбаўлення волі[3]. 28 чэрвеня 2022 года праваабарончы цэнтр «Вясна» прызнаў Данілевіча вязнем сумлення[4].
Дзейнасць правіць
Спецыялізуецца на пытаннях міжнароднага камерцыйнага арбітражу, міжнароднага грамадзянскага працэсу, міжнароднага сямейнага права і спартыўнага права. Унесены ў міжнародны даведнік Who’s Who Legal у раздзелы «Арбітраж», «Вырашэнне спрэчак» і «Спорт і забавы»[1].
У 2016 г. прызначаны арбітрам ад Рэспублікі Беларусь у Міжнародным цэнтры па ўрэгуляванні інвестыцыйных спрэчак (МЦУІС) у г. Нью-Ёрк[1].
Аўтар шэрагу артыкулаў і манаграфій па пытаннях міжнароднага камерцыйнага арбітражу, міжнароднага прыватнага права і спартыўнага права, апублікаваных у часопісах «International Sports Law Journal», «Третейский суд», «Веснік Вышэйшага Гаспадарчага Суда Рэспублікі Беларусь», «Беларускі часопіс міжнароднага права і міжнародных адносін», «Прамыслова-гандлёвае права», «Юрыст»; аўтар дапаможніка «Міжнародны камерцыйны арбітраж» 2004 г., сааўтар навучальнага дапаможніка «Міжнародны камерцыйны арбітраж» 2017 г., аўтар раздзелаў «Міжнароднае прыватнае права. Беларусь» і «Спартыўнае права. Беларусь» у Сусветнай энцыклапедыі права, раздзела «Міжнароднае прыватнае права. Беларусь» у Энцыклапедыі міжнароднага прыватнага права і шэрагу іншых публікацый[1].
Член дысцыплінарнага камітэта еўрапейскай асацыяцыі «Рэгбі Еўропы» (г. Парыж, Францыя)[1].
Валодае англійскай, французскай і італьянскай мовамі[1].
Узнагароды правіць
Уладальнік прыза «Феміда» ў намінацыі «Трацейскі (міжнародны арбітражны) суд», вышэйшай грамадскай юрыдычнай ўзнагароды ў Беларусі, заснаванай Беларускім саюзам юрыстаў (2016 г.)[1].
Зноскі
- ↑ а б в г д е ё ж Данилевич Александр Станиславович. Кафедра международного права(недаступная спасылка)
- ↑ «Страшна ў Марыупалі, а тут бздура нейкая». З БДУ звальняюць дацэнта, бо падпісаў антываенны зварот 18.04.2022
- ↑ «За дапамогу Герасімені і Апейкіну» адвакат асуджаны на двухзначны тэрмін. Новы Час (10 красавіка 2023).
- ↑ Заява аб прызнанні 14 новых палітычных зняволеных. Праваабарончы цэнтр «Вясна» (28 чэрвеня 2022).
Спасылкі правіць
- Данилевич Александр Станиславович. Кафедра международного права(недаступная спасылка)