Вікторыя Уладзіміраўна Паўловіч

Вікторыя Уладзіміраўна Паўловіч (нар. 8 мая 1978, Мінск) — беларуская спартсменка, гулец у настольны тэніс. Бронзавы прызёр чэмпіянату свету 2006 года па настольным тэнісе ў камандным турніры, трохразовая чэмпіёнка Еўропы (у адзіночным разрадзе і ў пары). Удзельніца 4-х летніх Алімпійскіх гульняў (2000—2012). Заслужаны майстар спорту Рэспублікі Беларусь (2007).

Вікторыя Уладзіміраўна Паўловіч
Viktoria Pavlovich-001.JPG
Агульная інфармацыя
Пол жанчына
Спецыялізацыя настольны тэніс
Нарадзілася 8 мая 1978(1978-05-08)[1] (42 гады)
Грамадзянства
Спартыўныя ўзнагароды
Настольны тэніс
Чэмпіянаты свету
Бронза Брэмен 2006 каманда
Чэмпіянаты Еўропы
Золата Бялград 2007 парны разрад
Золата Острава 2010 адзіночны разрад
Золата Хернінг 2012 адзіночны разрад
Срэбра Заграб 2002 парны разрад
Срэбра Курмаёр 2003 мікст
Срэбра Орхус 2005 мікст
Срэбра Субаціца 2009 мікст
Бронза Заграб 2002 мікст
Бронза Бялград 2007 адзіночны разрад
Бронза Штутгарт 2009 адзіночны разрад
Бронза Субаціца 2010 мікст
Бронза Гданьск-Сопат 2011 каманда

У настольны тэніс Вікторыю і яе сястру Вераніку прывяла маці. Даволі хутка Вікторыя стала паўнапраўным членам зборнай Беларусі па настольным тэнісе. У 1995 годзе Паўловіч дэбютавала на сусветным першынстве, але дэбют аказаўся не занадта ўдалым і Вікторыя выбыла з барацьбы ўжо на ранніх стадыях турніру.

Дэбют на летніх Алімпійскіх гульнях у Вікторыі Паўловіч адбыўся ў 2000 годзе ў Сіднеі. У адзіночным разрадзе беларуская спартсменка заняла ў групе другое месца і не змагла прабіцца ў наступны раўнд. У парным разрадзе разам з Таццянай Кастраміной Вікторыя пераадолела бар'ер групавога этапу, але ўжо ў першым раўндзе плэй-оф беларуская пара пацярпела паражэнне ад карэянак. У 2002 годзе Паўловіч упершыню стала прызёрам еўрапейскага чэмпіянату, заняўшы другое месца ў парным разрадзе. Усяго на рахунку беларускай тэнісісткі 3 залатыя, 4 сярэбраныя і 4 бронзавыя медалі кантынентальных першынстваў.

На летніх Алімпійскіх гульнях 2004 года ў Афінах Вікторыя Паўловіч здолела прайсці адзін раўнд спаборніцтваў у адзіночным разрадзе, але саступіла на стадыі 1/8 фіналу і выбыла з турніру. У парным разрадзе дуэт Паўловіч-Кастраміна выбыў ужо ў першым раўндзе, саступіўшы тэнісісткам з Італіі. У 2006 годзе на чэмпіянаце свету ў нямецкім Брэмене зборная Беларусі з Вікторыяй Паўловіч у складзе ў камандным турніры здолела дайсці да паўфіналу турніру, дзе саступіла зборнай Кітая і заняла трэцяе месца, прынёсшы Паўловіч першую ў яе кар'еры ўзнагароду сусветных першынстваў.

У 2008 годзе на летніх Алімпійскіх гульнях у Пекіне Паўловіч прыняла ўдзел толькі ў адзіночным разрадзе. Але ўжо на стадыі 1/16 фіналу Паўловіч мелася сустрэцца з дзеючай алімпійскай чэмпіёнкай кітаянкай Чжан Інін. Асаблівай барацьбы ў матчы не атрымалася і кітайская спартсменка атрымала пераканаўчую перамогу 4-0.

16 мая 2011 года Паўловіч заваявала права выступіць на летніх Алімпійскіх гульнях 2012 года ў Лондане, трапіўшы ў лік 28-мі наймацнейшых тэнісістак свету.

Зноскі