Кайкэн

Кайкэн — кінжал, які насілі мужчыны і жанчыны самурайскага класа ў Японіі, разнавіднасць танта. Кайкэны выкарыстоўваліся для самаабароны ў памяшканні, дзе доўгія катаны і сярэдняй даўжыні вакідзасі былі менш зручныя і эфектыўныя, чым кароткія кінжалы. Жанчыны насілі іх у поясе-обі для самаабароны або (рэдка) для самагубства (дзігая). Можна было насіць іх і ў парчовым мяшэчку са шнурком, што дазваляла хутка дастаць кінжал. Кайкэн уваходзіў у пералік вясельных падарункаў жанчыне. У цяперашні час ён з’яўляецца адным з аксесуараў традыцыйнай японскай шлюбнай цырымоніі: нявеста бярэ кайкэн, каб ёй спадарожнічала ўдача.