Негеў (іўр.: הנגב, ст.-яўр. הַנֶגֶב: / ха-нэгэв /) — пустыня на Блізкім Усходзе, якая размяшчаецца ў Ізраілі (займае каля 60 % яго тэрыторыі). Плошча 12 000 км². Негеў абмежаваны Міжземным морам і Сінайскай пустыняй на захадзе, гарамі Мааў і Іўдзейскай пустыняй на поўначы, далінай Арава на ўсходзе, Эйлацкім залівам на поўдні. Рэгіён Негева прынята дзяліць на ўласна Негеў і Паўночны Негеў.

Панарама пустыні Негеў
Расліннасць пустыні Негеў

Слова «Негеў» у перакладзе азначае «поўдзень» на Торы, і «сухі».

З пункту гледжання геалогіі — гэта плато, размешчанае на вышыні 600—800 метраў над узроўнем мора. Для гэтага пустыннага раёна, складзенага вапнякамі, характэрныя розныя формы арыднай дэнудацыі. Толькі ў Негеве існуюць «махтэшым» — глыбокія авальныя ўпадзіны з роўнымі стромымі бакамі. Тыповы з такіх махтэшым, махтэшым Рамон, мае глыбіню 300 метраў, шырыню 8 кіламетраў і даўжыню 40 кіламетраў. Утварыліся яны па карстовым прынцыпе: падземныя патокі высушылі ніжнія скальныя пласты, пасля чаго верхнія «ўсохлі» і як бы «праваліліся», утварыўшы варонку.

Уласна Негеў уяўляе сабой высмаглую пустыню. У Паўночны Негеў праведзены Усеізраільскі вадаправод, што дало магчымасць ператварыць яго ў зону інтэнсіўнага земляробства. Тут знаходзіцца мноства мошаваў і кібуцаў, а таксама гарады Ашкелон, Сдэрот, Нэцівот, Афакім. На тэрыторыі Паўночнага Негева таксама знаходзіцца Сектар Газа (амаль 100 % водазабеспячэння якога таксама ажыццяўляецца Усеізраільскім вадаправодам). Непасрэдна ў Негеве размешчаны Дымоне і Арад. Мяжой паміж Паўночным Негевам і ўласна Негевам лічыцца раён Беэр-Шэвы.

На поўначы Негева знаходзіцца і адзін з самых вялікіх у краіне лясных масіваў — Яцір. Работы па пасадцы дрэў тут былі пачаты ў 1964 годзе, колькасць дрэў перавышае чатыры мільёны.

Спасылкі правіць