Знішчэнне добра ўмацаванага гарнізона ў вёсцы Сейлавічы (каля 100 салдат) павінна было аблегчыць перадыслакацыю і баявыя рэйды партызанскіх фарміраванняў на захадзе Беларусі. Вакол гарнізона праціўнікам была створана сістэма дзотаў, бункераў, ліній траншэй, з некалькімі радамі калючага дроту, асобныя ўчасткі абароны былі замініраваны.
Аперацыю па разгрому гарнізона ажыццяўляў атрад імя Шчорса пад камандаваннем А. І. Колчанкі, які налічваў 350 байцоў, якія мелі на ўзбраенні акрамя вінтовак, 15 ручных кулямётаў, 25 аўтаматаў і 45-міліметровую гармату з абмежаванай колькасцю снарадаў. Раніцай 7 верасня 1943 партызанская разведка паведаміла, што 60 нямецкіх салдат накіраваліся з вёскі Сейлавічы ў гарадскі пасёлак Гарадзея Нясвіжскага раёна. Вечарам таго ж дня партызанскі атрад скрытна выйшаў на паўднёвы ўзлесак Язвінскага лесу і ў 23 гадзіны з трох напрамкаў атакаваў гарнізон праціўніка. Да гадзіны ночы 8 верасня 1943 года гарнізон быў разбіты, яго страты склалі 28 забітых. Партызаны захапілі зброю, боепрыпасы і без страт арганізавана адышлі.