Фрэнкі Валі

Фрэнкі Валі (англ.: Frankie Valli, сапраўднае імя Francesco Stephen Castelluccio; нар. 3 мая 1934) — амерыканскі спявак, найбольш вядомы як фронтмэн вакальнай поп-групы The Four Seasons і ўладальнік магутнага фальцэта.

Фрэнкі Валі
англ.: Frankie Valli
Асноўная інфармацыя
Дата нараджэння	3 мая 1934(1934-05-03) (89 гадоў)
Месца нараджэння	Ньюарк, Нью-Джэрсі
Краіна	ЗША
Музычная дзейнасць
Прафесіі	спявак, студыйны музыкант, акцёр
Пеўчы голас	falsetto[d]
Інструменты	вакал
Жанры	поп-музыка і рок-н-рол
Узнагароды	Зала славы Нью-Джэрсі[d]
frankievallifourseasons.com
Медыяфайлы на Вікісховішчы

Біяграфія

Дыяпазон голасу Валі — тры з паловай актавы. На фальцэт са свайго «прыроднага» барытона ён можа пераходзіць без звычайнага для спевакоў фальцэтам разрыву. Калі прадзюсар Боба Кру параіў выкарыстаць гэтую здольнасць спевака, удзельнік The Four Seasons Боб Гаўдыа напісаў песню «Sherry», да гурта прыйшоў вялікі поспех — у канцы лета 1962 года «Sherry» узначаліла амерыканскі нацыянальны чарт. Прыблізна ў гэты час (па іншых дадзеных, у 1964 годзе) Гаўдыа і Валі змацавалі поціскам рукі неафіцыйнае пагадненне заўсёды дзяліць свае даходы паміж сабой напалову. З таго часу яны працавалі разам над многімі праектамі і шмат дзясяткаў гадоў незалежна ад таго, хто з іх зарабляе, гэтую дамоўленасць выконваюць.

У сярэдзіне 1960-х, застаючыся ўдзельнікам гурта, Валі пачаў сольную кар’еру. Трыумфу ён дасягнуў з песняй «Can’t Take My Eyes Off You», якая па выніках 1967 года была намінаваная на «Грэмі», а сінгл з яе быў сертыфікаваны залатым за продажы ў больш чым мільёне асобнікаў. Яна заставалася адзіным сольным залатым поспехам спевака аж да 1976 года, калі «My Eyes Adored You» узначаліла «гарачую сотню» «Білборда». А ў 1978 годзе спявак запісаў напісаную Бары Гібам тытульную песню для фільма-мюзікла «Брыялін». Сінгл з ёй стаў плацінавым.

У 1967 годзе спеваку быў пастаўлены дыягназ «атэрасклероз». Лекары сказалі яму, што рана ці позна ён аглухне. У нейкі перыяд ён пачаў чуць так дрэнна, што на канцэртах ледзь мог пачуць музыку. Яго кар’еры мог наступіць канец, але ў канцы 1970-х амаль цудам серыяй аперацый яго слых удалося аднавіць.

На сённяшні дзень Фрэнк Валі працягвае запісваць дыскі і выступаць з канцэртамі.