Dreamlin
Dreamlin — электронны музычны калектыў з Беларусі.
Dreamlin | |
---|---|
Жанр | Электронная музыка |
Гады | 2000-па сённяшні дзень |
Краіна | Беларусь |
Горад | Мінск |
Лэйблы | Gizmo Lab, Shum Records, 56 Stuff, Collaps, Kahvi Collective |
Склад | Дзяніс Карабкоў, Ягор Куноўскі, Андрэй Карповіч |
Былыя ўдзельнікі |
Ганна Лазарэвіч, Кірыл Скарынін |
Іншыя праекты |
Parason |
dreamlin.info |
Гурт Dreamlin родам з Мінска, пачаў сваю дзейнасць, калі Дзяніс «С4» Карабкоў сустрэўся з Ягорам Куноўскім, які даўно займаўся камп’ютарнай музыкай. У 2000 годзе яны аб’ядналіся як Dreamlin. Іх музыка выкарыстоўвалася ў некалькіх андэграўндных фільмах і відэа па ўсім свеце.
У 2002 годзе яны пачалі выступаць перад публікай. Гурт аддаваў перавагу змешванню электронных і жывых інструментаў, такіх як гітара, ударная ўстаноўка, электронныя барабаны, флейта і ўсе віды перкусіі.
Да 2004 года Ягор гуляе большасць канцэртаў разам з мульціінструменталістам Андрэем Карповічам, а Дзяніс аддае перавагу студыйнай працы, і не толькі з праектам Dreamlin. Музыкі сумесна працавалі як з мясцовымі калектывамі, так і з замежнымі, іх геаграфія распасціраецца ад Фінляндыі да Гаваяў.
Стыль музыкі Dreamlin не абмяжоўваецца жанравымі рамкамі. Звычайна гурт прэзентуецца як downtempo-калектыў, аднак у іх музыцы можна пачуць амаль любы жанр электроннай музыкі, хіба толькі акрамя трансу.
Першы альбом, «The colour of the city», быў выпушчаны ў 2004 годзе ў Беларусі, у 2005 годзе ў Расіі і з 2006 года ён даступны ў інтэрнэце. Пасля зачынення лэйбла «Collaps» альбом быў зняты з продажу, і паўторна выпушчаны ў 2013 годзе.
У 2006 калектыў быў упершыню запрошаны сыграць канцэрт за межамі былога СССР.
Другі рэліз гурта Dreamlin — «Monday Islands» (EP), быў выпушчаны ў 2008 годзе ў лічбавым фармаце. Наступны EP «Let's» быў выпушчаны ў 2011 годзе.