Анатоль Шумчанка
Анатоль Шумчанка (нарадзіўся 21 студзеня 1976[1][2], г. Мінск) — лідар прадпрымальнікаў, старшыня прадпрымальніцкага грамадскага аб'яднання «Перспектыва».
| Анатоль Шумчанка | |
|---|---|
| Дата нараджэння | 21 студзеня 1976 (48 гадоў) |
| Месца нараджэння | |
| Грамадзянства | |
| Альма-матар | |
Біяграфія правіць
Вучыўся ў ПТВ-222 гандлю, скончыў камерцыйны Міжнародны гуманітарна-эканамічны універсітэт.
У 22 гады быў прадаўцом на рынку «Дынама». Праз пэўны час сам стаў прадпрымальнікам.
На сённяшні час бізнэсу не мае, замаймаецца грамадскай дзейнасцю[2].
Сям'я: жана — Вольга, дачка — Ганна.
Грамадская дзейнасць правіць
Узначальваў «Аб'яднаную раду прадпрымальнікаў»[3].
Гэтая арганізацыя была ўтварана ў верасні 2002 г. пасля масавых акцый пратэсту прадпрымальнікаў летам і восенню 2002 года, накіраваных супраць уціску з боку дзяржавы іх эканамічных правоў[4].
12 сакавіка 2003 года было зарэгістравана грамадскае аб'яднанне «Перспектыва», кіраўніком якой стаў А.Шумчанка.
17 лютага 2006 года аб'яднанне прайшло перарэгістрацыю[4].
У першыя гады сваёй грамадскай дзейнасці А.Шумчанка актыўна меў зносіны з апазіцыйнымі палітыкамі: ён разам з М. Статкевічам быў ініцыятарам стварэння аб'яднанай сацыял-дэмакратычнай партыі, якая так і не ўзнікла. А «Перспектыва» ўваходзіла ў кааліцыю партый і арганізацый, якія ставілі мэтай ўступленне Беларусі ў Еўрасаюз.
З цягам часу А.Шумчанка адышоў ад палітычных патрабаванняў, сканцэнтраваўся на праблемах прадпрымальнікаў. Так, ён адмовіўся ўдзельнічаць у Кангрэсе дэмсілаў па выбарах адзінага кандыдата ад апазіцыі ў 2005 годзе[2].
Пераслед за грамадскую дзейнасць правіць
Падчас восеньскага пратэста 2003 супраць зносу кіёскаў і пазбаўлення прадпрымальнікаў крыніцы даходу, быў арганізаваны пікет каля адміністрацыі Маскоўскага раёна г. Мінска, у выніку чаго А.Шумчанка быў арыштаваны на 5 сутак[5].
1 студзеня 2005 г. ўвайшло ў сілу Пагадненне паміж Урадам Расійскай Федэрацыі і Урадам Рэспублікі Беларусь «Аб прынцыпах збірання ўскосных падаткаў пры экспарце і імпарце тавараў, выкананні работ, аказанні паслуг»[4]
ІП павінны былі выплачваць падатак на даданую вартасць, які складаў 18 % ад цаны тавару.
1 сакавіка 2005 г. некалькі тысяч прадпрымальнікаў выйшлі на Кастрычніцкую плошчу з патрабаваннем адмены падатку[2]. А. Шумчанка быў арыштаваны і асуджаны на 10 сутак адміністрацыйнага арышту, аднак па заканчэнні тэрміну на волю не выйшаў.
11 сакавіка А. Шумчанка быў пераведзены ў СІЗА г. Мінска ў сувязі з тым, што яго абвінавацілі ў збіцці сукамерніка падчас адбыцця адміністрацыйнага арышта. Абвінавачанне прад'яўлена па арт. 339 ч. 1 Крымінальнага кодэкса — хуліганства.
18 сакавіка 2005 г. Анатолю Шумчанку прад'яўлена абвінавачаньне па арт. 331 КК РБ — хуліганства[6].
Праваабаронцы палічылі яго крымінальную справу палітычна матываванай[7].
31 сакавіка 2005 г. А. Шумчанка быў вызвалены з Мінскага следчага ізалятара паводле пастановы Мінскай пракуратуры, якая спыніла крымінальную справу супраць яго з прычыны «малой значнасці злачынства»[8].
З 1 студзеня 2008 года ўвайшоў у дзеянне ўказ прэзідэнта № 760, паводле якога індывідуальныя прадпрымальнікі (ІП) былі пазбаўленыя права наймаць работнікаў не з ліку блізкіх сваякоў (ня больш за тры чалавекі). Гэты ўказ пакінуў без сродкаў да існавання вялікую колькасць людзей, якія займаліся ў сферы дробнага бізнэсу. Акрамя таго, ён закрануў і простых грамадзянаў[9].
Спробы прадпрымальніцкіх лідараў наладзіць з уладамі перамовы вынікаў не далі, індывідуальныя прадпрымальнікі выйшлі на вуліцы[9].
У студзені 2008 года прайшлі буйныя вулічныя акцыі прадпрымальнікаў. Галоўнай з іх быў мітынг 10 студзеня 2008 года, калі прадпрымальнікі накіравалі дэлегацыю ў Адміністрацыю прэзідэнта і арганізавалі несанкцыянаванае шэсце да Дому ўрада.
Тады А. Шумчанка ў Адміністрацыі прэзідэнта сустракаўся з загадчыцай галоўнага эканамічнага ўпраўлення Адміністрацыі прэзідэнта Інай Мядзведзевай[4].
Пасля вяртання А. Шумчанка з перамоў яго затрымалі і асудзілі на 15 сутак.
Таксама вынікам гэтага мітынгу была «справа 14-ці»: 14 маладзёжных актывістаў А.Кім, М.Пашкевіч, М. Крываў, У. Сяргееў, А. Койпіш, Т. Цішкевіч, А.Стральцоў, А. Бондар, А.Дубскі, А.Чарнышоў, М. Субач, П. Вінаградаў, М. Дашук, А. Баразенка[10] былі асуджаныя да розных тэрмінаў абмежавання волі. Усе яны былі прызнаныя палітвязнямі[11].
27 чэрвеня 2013 г. ў Мінску каля 12 гадзін супрацоўнікі міліцыі затрымалі А.Шумчанку і журналістаў, якія накіроўваліся ў гандлёвы цэнтр «Паркінг», дзе страйкавалі прадпрымальнікі. А.Шумчанка разам з прадпрымальнікамі планаваў перадаць патрабаванні дробнага бізнесу ў Дэпартамент прадпрымальніцтва Міністэрства эканомікі. Праз 2 гадзіны журналісты былі адпушчаны, на А.Шумчанку — складзены пратакол адміністрацыйнага правапарушэння — арганізацыя несанкцыянаванага масавага мерапрыемства, і ў гэты ж дзень суд Цэнтральнага раёна Мінска асудзіў яго на пяць сутак арышту[12].
За ўдзел у несанкцыянаваным мітынгу прадпрымальнікаў каля будынка Міністэрства падаткаў і збораў, які прайшоў 14 сакавіка 2016 года у Мінску А. Шумчанка пакараны штрафам у памеры 15 базавых велічынь (3 млн 150 тыс. рублёў)[13].
Зноскі
- ↑ Анатоль Шумчанка сустракае дзень народзінаў у турме
- ↑ а б в г Хотел стать президентом: пять фактов о предпринимательском лидере Анатолии Шумченко
- ↑ Хотел стать президентом: пять фактов о предпринимательском лидере Анатолии Шумченко
- ↑ а б в г Наша история Архівавана 22 сакавіка 2017.
- ↑ Наша история Архівавана 22 сакавіка 2017.
- ↑ Агляд-хроніка парушэнняў правоў чалавека ў Беларусі ў 2005 годзе. ПЦ "Вясна ". — Менск, 2006 г. С.54
- ↑ Агляд-хроніка парушэнняў правоў чалавека ў Беларусі ў 2005 годзе. ПЦ "Вясна ". — Менск, 2006 г. С.45-58
- ↑ Анатоль Шумчанка(недаступная спасылка). Архівавана з першакрыніцы 29 снежня 2016. Праверана 26 мая 2017.
- ↑ а б Агляд-Хроніка парушэньняў правоў чалавека ў Беларусі ў 2008 годзе
- ↑ Дело 14-ти: обвиняемые не признали себя виновными
- ↑ Ці зробяць палёгку для ІП?
- ↑ Агляд-хроніка парушэньняў правоў чалавека ў Беларусі Правы чалавека ў Беларусі. Чэрвень 2013
- ↑ Сітуацыя з правамі чалавека ў Беларусі. Красавік 2016 Штрафы за мітынг прадпрымальнікаў