Знак Беларускай вайсковай камісіі

Знак Белару́скай вайско́вай камі́сіі — знак і кукарда Беларускай вайсковай камісіі перыяду Беларускай Народнай Рэспублікі і часоў урада БНР у выгнанні.

Знак Беларускай вайсковай камісіі
Краіна	БНР
Тып	знак (кукарда)
Каму ўручаецца	вайскоўцам і грамадскім дзеячам
Дата заснавання	невядомая
Статус	не ўручаецца

Дата заснавання знака невядомая, але на фотаздымку пасведчання сябра Беларускай вайсковай камісіі, выдадзенага 6 верасня 1920 года, знак прысутнічае на лацкане пінжака Антона Борыка. Мяркуецца, што дадзены знак выраблены не пазней за май 1920 года.

З лета 1920 года выкарыстоўваўся як адметны знак сябра Беларускай вайсковай камісіі са спецыяльна адціснутай з жоўтага метала авальнай кукардай са шчытом у сярэдзіне, на якім размешчаны герб БНР «Пагоня».

У 1920-я гады знак выкарыстоўваўся навучэнцамі Віленскай беларускай гімназіі.

Асобнік знака (кукарды) Беларускай вайсковай камісіі захоўваецца ў фондах Нацыянальнага гістарычнага музея Украіны, куды ён трапіў пасля Другой сусветнай вайны з Украінскага музея вызваленчай барацьбы.

У 1930-я гады Украінскі музей вызваленчай барацьбы размяшчаўся ў Празе. У гэты момант там жа размяшчаўся Урад БНР у выгнанні. Частка беларусаў па дамоўленасці паміж уладамі Украінскай Народнай Рэспублікі і Беларускай Народнай Рэспублікі вучылася ва ўкраінскіх установах, размешчаных у Чэхаславакіі. Па здагадцы даследчыкаў, знак Беларускай вайсковай камісіі маглі перадаць ва ўкраінскі музей студэнты-беларусы.

Пасведчанне сябра Беларускай вайсковай камісіі Антона Борыка, выдадзенае 6 верасня 1920 года. На лацкане пінжака знак БВК

• 
  Аверс
• 
  Рэверс

У 2017 годзе з’явілася інфармацыя пра тое, што знак БВК быў знойдзены ў раёне вёскі Ігарава, 16 жыхароў якой удзельнічалі ў Слуцкім паўстанні 1920 года ў складзе 2-га Грозаўскага палка. Артэфакт знаходзіцца ў прыватнай калекцыі.

Спасылкі

• Рудиченко А. И., Тинченко Я. Ю. Награды и знаки национальных армий и правительств. Украина. Белоруссия. Литва. Учредительные документы. Изготовление. Практика награждений. Типы и разновидности. — Киев : Логос, 2011. — 438 с. — 750 прим. — ISBN 978-966-171-365-8.
• Знойдзена цешка з Пагоняй, якую выкарыстоўвалі слуцкія паўстанцы