Карэл Фабрыцыус

Карэл Фабрыцыус (нідэрл. Carel Fabritius; ахрышчаны 27 лютага 1622 — 12 кастрычніка 1654) — галандскі мастак, адзін з самых таленавітых вучняў Рэмбранта. Заснавальнік дэлфцкай школы жывапісу. Вядома толькі 16 палотнаў Фабрыцыуса, якія з большай ці меншай верагоднасцю прыпісваюцца мастаку.

Карэл Фабрыцыус
нідэрл.: Carel Pietersz Fabritius
Дата нараджэння	не пазней за 27 лютага 1622
Месца нараджэння	Middenbeemster[d], Beemster[d], Purmerend[d], Паўночная Галандыя, Рэспубліка Злучаных правінцый
Дата смерці	12 кастрычніка 1654(1654-10-12)[…] (32 гады)
Месца смерці	Дэлфт, графства Галандыя, Рэспубліка Злучаных правінцый
Грамадзянства	Рэспубліка Злучаных правінцый
Бацька	Pieter Carelsz. Fabritius[d]
Род дзейнасці	мастак, архітэктурны чарцёжнік, цясляр
Жанр	гарадскі пейзаж[d], жанравы жывапіс, партрэт, trompe-l'œil[d], анімалістыка, гістарычны жывапіс, пейзаж і hunting still life[d]
Мастацкі кірунак	Delft School[d] і барока
Уплыў	Рэмбрант
Медыяфайлы на Вікісховішчы

Біяграфія

Карэл Пітэрс нарадзіўся ў 1622 годзе ў Мідэн-Бемстэры каля Амстэрдама (цяпер частка абшчыны Бемстэр) у сям’і настаўніка. Па адной з версій, псеўданім «Фабрыцыус» (ад лац. faber — «цясляр») абумоўлены тым, што ў юнацтве Карэл навучаўся адпаведнаму рамяству. У пачатку 1640-х гадоў разам са сваім братам Барэнтам Фабрыцыусам вучыўся ў студыі Рэмбранта ў Амстэрдаме, працаваў спачатку ў гэтым горадзе, аднак у 1643 годзе, пасля смерці дваіх дзяцей і жонкі падчас яе трэціх родаў, вярнуўся ў Мідэн-Бемстэр.

У 1650 годзе зноў ажаніўся і пасяліўся ў Дэлфце, дзе праз два гады стаў майстрам гільдыі Св. Лукі. Паступова набыў папулярнасць у якасці майстра насценных роспісаў (не захаваліся), а таксама партрэтыста. У 32 гады загінуў пры выбуху парахавых складоў у Дэлфце, які разбурыў цэлы гарадскі квартал.