Парламенцкая асамблея Еўранэст

Парламенцкая асамблея Еўранэст (англ.: Euronest Parliamentary Assembly) — міжпарламенцкая ўстанова, якая аб’ядноўвае прадстаўнікоў Еўрапарламента і парламентаў краін-удзельніц Усходняга партнёрства. Створана з мэтай спрыяння палітычнай асацыяцыі і далейшай эканамічнай інтэграцыі паміж Еўрапейскім Саюзам і краінамі Усходняга партнёрства. Еўранэст робіць уклад ва ўмацаванне і развіццё Усходняга партнёрства, як установа, якая адказвае за парламенцкія кансультацыі, нагляд і кантроль.

Устаноўчы акт Парламенцкай асамблеі Еўранэст падпісаны ў Брусэлі 3 мая 2011 года.

Склад

Асамблея складаецца з дэлегацыі Еўрапарламента і дэлегацый краін-удзельніц Усходняга партнёрства (Арменія, Азербайджан, Грузія, Малдова, Украіна). Дэлегацыю Еўрапейскага парламента складаюць 60 еўрадэпутатаў, а дэлегацыі краін-удзельніц -10 прадстаўнікоў ад кожнай краіны.

Беларусь, якая з'яўляецца ўдзельніцай Усходняга партнёрства, не мае прадстаўнікоў у Асамблеі па палітычных прычынах, звязаных з падзеямі снежня 2010 года ў Мінску.

Структура

Асамблея мае наступную структуру:

• Пленум Парламенцкай асамблеі Еўранэст;
• Бюро;
• Камітэты;
• Сакратарыят.

Таксама існуюць пасады двух сустаршыняў, якія кіруюць на пленарных паседжаннях.

Камітэты і працоўныя групы

Пастаянныя камітэты Асамблеі сустракаюцца двойчы на год. Адна з такіх сустрэч адбываецца паралельна з пленарнай сэсіяй. Працоўныя групы сустракаюцца пры неабходнасці.

Пастаянныя камітэты

• Камітэт па палітычных пытаннях, правах чалавека і дэмакратыі;
• Камітэт па эканамічнай інтэграцыі, збліжэнні прававых норм і канвергенцыі з палітыкай ЕС;
• Камітэт па энергетычнай бяспецы;
• Камітэт па сацыяльных пытаннях, адукацыі, культуры і грамадзянскай супольнасці.

Працоўныя групы

• Працоўная група па Беларусі;
• Працоўная група па працэдурных правілах.