Чырвоны Кастрычнік (жылы раён)
Чырвоны Кастрычнік (або Красны Акцябр) — жылы масіў у паўночнай частцы Гомеля, адміністрацыйна прыналежыць да Чыгуначнага раёна. У межах Гомеля з 1972 г., да гэтага — пасёлак Пакалюбіцкага сельсавета Гомельскага раёна Гомельскай вобласці[1][2][3].
На момант далучэння да горада пражывала 1 тыс. чалавек. Асноўная вуліца — Лепяшынскага. Пераважае індывідуальная забудова сядзібнага тыпу. Да яго абшараў адносіцца і прамысловая зона, у якой, станам на 1991 г., месціліся выданне абкаму КПБ, заводы радыё-тэхнічнага аснашчэння і «Карал»[1].
Як пасёлак стаў фарміравацца на мяжы 1920-х — 1930-х гадоў. Па ўспамінах старажылаў у 1933 г. тут было ўсяго 5 дамоў. Палявая мясцовасць тут чаргавалася з асобнымі балотцамі і азярцамі, частку якіх з цягам часу асушылі і засыпалі[4].
Краязнавец А. Рогалеў беспадстаўна сцвярджае, што назва гэтага пасёлка была перанесена і на забудову ў канцы вуліцы Савецкай[5], што выглядае крайне малаверагодным, бо гомельскі Чырвоны Кастрычнік (ранейшы Земпасад) існаваў пад такой назвай, прынамсі, з сярэдзіны 1920-х гадоў, а жылых памяшканняў станам на 1927 г. у ім налічвалася 125[6].
Згодна з матэрыяламі Надзвычайнай дзяржаўнай камісіі, нацысцкія акупанты расстралялі двух жыхароў Чырвонага Кастрычніка: у лістападзе 1941 г. быў расстраляны Васіль Васілевіч Краўцоў (1897 года нараджэння), а ў сакавіку 1943 г. — Аляксандр Сяргеевіч Ягадкін (1928 года нараджэння)[7].
Зноскі
- ↑ а б Красный Октябрь // Гомель. Энциклопедический справочник / Гл. редактор И. П. Шамякин. — Мн. : БелСЭ им. П. Бровки, 1991. — С. 272.
- ↑ Гомель. План города. Гомельский район. Карта [Карты] / редактор В. А. Змачинская. — Минск : Белкартография, 2018.
- ↑ Указ Прэзідыума Вярхоўнага Савета БССР Аб уключэнні ў састаў горада Гомеля пасёлка Красны Акцябр Пакалюбіцкага сельсавета Гомельскага раёна ад 6 красавіка 1972 г. // Збор законаў, указаў Прэзідыума Вярхоўнага Савета Беларускай ССР, пастаноў і распараджэнняў Савета Міністраў Беларускай ССР. — 1972, № 11 (1349).
- ↑ Рогалев, А. Ф. Гомель. Страницы истории, формирование улиц, местные тайны и загадки / А. Ф. Рогалев. — Гомель : Барк, 2014. — С. 191.
- ↑ Рогалев, А. Ф. Гомель. Страницы истории, формирование улиц, местные тайны и загадки / А. Ф. Рогалев. — Гомель : Барк, 2014. — С. 192.
- ↑ Гомель и городские поселения Гомельщины: Предварит. итоги переписи 1926 г. и некоторые данные текущ. отчетов и обследований. — Речица, 1927. — С. 10.
- ↑ Государственный архив Российской Федерации. — Ф. Р-7021. Оп. 85. Д. 37. Л. 45.