Памеры адносна невялікія. Даўжыня цела 41-52 см, размах крылаў 105-120 см. Самец папялісты, з чорнымі палосамі на крылах. У самцоў, пачынаючы з другога паслягнездавога апярэння, больш выразнымі робяцца ржавага колеру рыскі на сподзе. Стройны сілуэт з доўгімі крыламі і хвастом. Самка падобная да самак палявога і стэпавага лунёў. Маладыя падобныя да маладых стэпавага луня. Голас падае рэдка.
Арэал: Еўропа (акрамя поўначы, часткова акрамя поўдня), Цэнтральная і Заходняя Азія (Каўказ), паўночны захад Афрыкі. Насяляе вялікія па плошчы лугі альбо балоты з высокай травой і групамі кустоў. Пералётны, месца зiмовак: Паўднёвая Азія, Афрыка на поўдзень ад Сахары і ў раёнах ніжняга Ніла. На Беларусі адносна звычайны на гнездаванні пералётны і транзітна мігрыруючы від.
Гняздо ладзіць каля асновы куста альбо паміж купінамі высокай травы. У аснове яго — некалькі галінак (часам з прымессю лісця трыснягу); высцілка ў выглядзе плоскага круга з доўгіх і сухіх траў, з латком.
Яйкі Circus pygargus
Яйкі (4-5) трошкі падоўжныя з тупым вузейшым канцом (радзей авальныя, з аднолькавымі канцамі); белыя, бела-зеленаватыя альбо бела-жаўтаватыя; часам ёсць іржава-карычневыя альбо ржава-ружовыя плямы.
.jpg)
