Іван Сямёнавіч Кулікоў

Іван Сямёнавіч Кулікоў (нар. 10 красавіка 1949, Хоцімск) — беларускі вучоны ў галіне энергетыкі і энергетычнага машынабудавання. Доктар фізіка-матэматычных навук (1995), кандыдат тэхнічных навук 1981), прафесар (2000).

Іван Сямёнавіч Кулікоў
Дата нараджэння	10 красавіка 1949(1949-04-10) (75 гадоў)
Месца нараджэння	Хоцімск, Хоцімскі раён, Магілёўская вобласць, БССР, СССР
Грамадзянства	СССР  Беларусь
Род дзейнасці	навуковец
Месца працы	Аб’яднаны інстытут энергетычных і ядзерных даследаванняў «Сосны»
Навуковая ступень	доктар фізіка-матэматычных навук (1995)
Альма-матар	Казанскі ўніверсітэт

Біяграфія

Скончыў Хоцімскую сярэднюю школу № 1 (1966), механіка-матэматычны факультэт Казанскага універсітэта (1972). У 1972—1974 гг. працаваў інжынерам у Казахскім аддзяленні Цэнтральнага НДІ праектавання стальных канструкцый у г. Алма-Ата, інжынерам-канструктарам Мінскага завода ацяпляльнага абсталявання. 3 1974 г.ў Інстытуце праблем энергетыкі Нацыянальнай Акадэміі навук Рэспублікі Беларусь (да 1991 Інстытут ядзернай энергетыкі АН БССР), аспірант (1974—1977), старшы інжынер, малодшы, потым старшы навуковы супрацоўнік, з 1988 г. — загадчык лабараторыі трываласці элементаў АЭС. Адначасова намеснік дырэктара інстытута па навуковай рабоце (1995—1998), дырэктар РУП «Белінвестэнергазберажэнне» (1998—2002). Член Экспертнага Савета па энергетыцы Вышэйшага атэстацыйнага камітэта (ВАК) РБ. Адзін з удзельнікаў падрыхтоўкі і рэалізацыі сумеснага з Сусветным банкам інвестыцыйнага праекта «Мадэрнізацыя інфраструктуры ў сацыяльнай сферы Рэспублікі Беларусь».

Асноўныя навуковыя працы прысвечаны пытанням трываласці і надзейнасці элементаў актыўных зон атамных рэактараў і цеплаабменнага абсталявання цеплавых і атамных электрастанцый, а таксама рэсурсазберагальным тэхналогіям.

Літаратура

• Памяць: Хоцімскі раён: гісторыка-дакум. хроніка / Гал. рэдактар Г. П. Пашкоў. — Мн.: БелЭн, 2003. — С. 513.
• Кулікоў Іван Сямёнавіч // Беларуская энцыклапедыя: У 18 т. Т. 9: Кулібін — Малаіта / Рэдкал.: Г. П. Пашкоў і інш. — Мн. : БелЭн, 1999. — Т. 9. — С. 6. — 10 000 экз. — ISBN 985-11-0035-8. — ISBN 985-11-0155-9 (т. 9).

Спасылкі

• Кулікоў Іван Сямёнавіч на сайце анлайн-энцыклапедыі «Беларусь у асобах і падзеях»