Агапій I

Агапій I (? — 22 красавіка 536, Канстанцінопаль), Папа Рымскі (535—536), рымлянін па паходжанні, прылічаны да святых.

Агапій I
57-ы Папа Рымскі 15 мая 535 — 22 красавіка 536
Папярэднік	Ян II
Пераемнік	Сільверый
Дзейнасць	каталіцкі святар, пісьменнік
Нараджэнне	невядома Рым, Каралеўства остготаў
Смерць	22 красавіка 536 Канстанцінопаль, Візантыя
Пахаванне	Сабор Святога Пятра
Медыяфайлы на Вікісховішчы

Па патрабаванні гоцкага караля Тэадата выправіўся ў Канстанцінопаль, каб паўплываць на візантыйскага імператара Юстыніяна, але палітычная мэта падарожжа не была дасягнутая. Аднак тычасова, намаганнямі Папы канстанцінопальскі патрыярх Анфім, абвінавачаны ў ерасі Еўціхія і калісьці насуперак кананічным правілам пераведзены з Трапезунду ў Канстанцінопаль, быў скінуты з патрыяршага стальца, а на яго месца з блаславення Агапія ўзведзены праціўнік Анфіма Менас.

Таксама Агапію ўдалося схіліць Юстыніяна і канстанцінопальскага патрыярха Менаса да фармальнай заявы аб тым, што яны цалкам падтрымліваюць пастановы Халкідонскага сабору (451), прызнаюць толькі формулу адзінароднага Хрыста ў двух існасцях, адкідаючы распаўсюджаныя ў Візантыі талкаванні прыроды Хрыста і манафізіцкае вучэнне. У выніку павінна было аднавіцца адзінства вызнавання веры і прызнанне прымату за Рымскім Папам. Агапій збіраўся яшчэ раз прыехаць у Канстанцінопаль дзеля кіравання саборам з мэтай канчатковага абвяшчэння прынятага ў Халкідоне сімвалу веры. Але гэтага не адбылося з-за смерці Агапія.

Літаратура

• Лозинский С. Г. История папства. — 3-е изд. — М., 1986.
• Агапій I // Энциклопедический словарь Брокгауза и Ефрона: В 86 томах (82 т. и 4 доп.) (руск.). — СПб., 1890—1907.