Алешы

Алешы — вялікалітоўскі шляхецкі род герба «Брохвіч» II.

Алешы
Краіна паходжання	Вялікае Княства Літоўскае
Прызнаныя ў	Вялікае Княства Літоўскае, Рэч Паспалітая, Расійская Імперыя

Паходзяць ад валынскага баярына Аляксандра, званага Алешам ці Алешкам, які быў жанаты з Аленай Макасей. Іх сын — Фёдар (Тэадор) Алеша Алешкавіч у 1482—1486 гадах быў сакратаром караля Казіміра Ягелончыка і быў жанаты з князёўнай Ганнай Астражэцкай. У Фёдара і Ганны быў сын Пётр, жанаты з Вольгай Чалганскай. Старэйшы сын Пятра і Вольгі — Пётр Пятровіч Алеша, быў жанаты з Еўдакіяй Фурса, атрымаў ад князя Фёдара Іванавіча Яраславіча ў 1508 годзе маёнтак Беражное на Палессі. У 1524 г. каралева Бона пацвердзіла правы Пятра Пятровіча Алешы на Беражное, Гарадок і Паркані.

Вядомы сын Пятра Пятровіча — ротмістр Тэадор Алеша. Сын Тэадора — Ян Алеша, быў мсціслаўскім паборцам у 1581 годзе. Фларыян Янавіч у 1583 годзе быў сакратаром каралеўскім і ў 1607 годзе быў прызначаны сеймам для «ўтаймавання казацкага бунту», у 1615 годзе займаў урад войскага ўладзімірскага. Сакратаром каралеўскім быў і сын Фларыяна — Станіслаў. Міхал Станіслававіч Алеша быў суддзём пінскім.

Да XIX ст. валоданні Алешаў значна ўзраслі. 12-м гаспадаром Старога і Новага Беражнога, Церабяжова, Гарадзішча, шэрагу іншых маёнткаў і дамоў у Вільні, Рызе і Пінску быў Цэзарый Антоній Алеша (1820—1892), жанаты з Аляксандрай Орда. Цэзарый Антоній меў 11 дзяцей: 6 сыноў і 5 дачок. Яшчэ пры жыцці ён падзяліў паміж дзецьмі маёмасць, Нова-Беражное атрымаў Канстанцін, а Стара-Беражное — малодшы сын Уладзіслаў Алеша.

З роду Алешаў паходзіць пісьменнік Юрый Алеша, але дакладны яго радавод невядомы на цяперашні час.

Радавод

1. Пятровіч, атрымаў маёнтак Беражное.
   1. Тэадор, ротмістр; ж. — Ефрасіння з Дубіцкіх.
      1. Ян, мсціслаўскі паборца ў 1581 годзе; ж. — княжна з Шуйскіх.
         1. Міхаіл.
            1. Самуіл.
               1. Ян Піус, ігумен віцебскі, аўтар рэлігійных прац.
               2. Людвіг.
                  1. Марцін.
               3. Фама.
                  1. Леапольд.
                     1. Ігнацій.
         2. Тэадор.
         3. Стэфан.
            1. Мікалай; ж. — Марыянна Скірмунт.
               1. Аляксандр.
               2. Самуіл, пінскі мастаўнічы, трыбунальны суддзя.
                  1. Юзаф.
                  2. Людвіг.
                     1. Юзаф.
                     2. Ігнацій.
                     3. Ян.
                        1. Матвей (нар. 1784).
                           1. Вікенцій (нар. 1819).
                           2. Аляксей (нар. 1829).
                        2. Ежы (Юрый) (нар. 1787).
                        3. Юсцін.
                           1. Антоній (нар. 1816).
                              1. Марын (нар. 1863).
                              2. Карл.
                           2. Варфаламей (нар. 1826).
                     4. Антоній.
                     5. Павел.
                  3. Самуіл.
                     1. Леон (нар. 1788).
                        1. Цэзар Антоній (1820—1892), ротмістр у расійскай арміі; ж. — Аляксандра Орда.
                           1. Канстанцін (нар. 1865); ж. — Каміла Орда.
                              1. Канстанцін (нар. 1891).
                           2. Леў (нар. 1865).
                              1. Чэслаў (пам. 1965).
                           3. Эдуард (нар. 1879).
                           4. Цэзар (нар. 1888).
                           5. Уладзіслаў (нар. 1888).
                              1. Міхаіл, інжынер лясной гаспадаркі.
                     2. Кароль (нар. 1791), пінскі падкаморый.
                     3. Гаўрыіл (нар. 1798).
   2. Пётр.
   3. Ян.

Літаратура

• Несцярчук Л. Замкі, палацы, паркі Берасцейшчыны X—XX стагоддзяў. — Мн.: БелТА, 2002.
• Федорук А. Т. Старинные усадьбы Берестейщины (руск.) / А. Т. Федорук; ред. Т. Г. Мартыненко. — 2-е изд. — Мн.: БелЭн, 2006. — 576 с: ил. — 1 500 экз. — ISBN 985-11-0383-7.