Беларускі паэтычны тэатр аднаго акцёра «Зніч»

Беларускі паэтычны тэатр аднаго акцёра «Зніч» — адзіны ў Беларусі тэатр, які працаваў выключна ў жанры монаспектаклю ў 1989—2023 гадах.

Беларускі паэтычны тэатр аднаго акцёра «Зніч»
Заснаваны	1989
Краіна	Беларусь
Размяшчэнне	Мінск
Сайт	teatr-znich.by

Асноўная рэпертуарная лінія тэатра — папулярызацыя твораў беларускіх аўтараў і ўзораў сусветнай класікі. Монаспектаклі тэатра «Зніч» ідуць на беларускай мове.

Гісторыя тэатра

Тэатр аднаго акцёра «Зніч» заснаваны ў 1989 годзе кіраўніцтвам Беларускай дзяржаўнай філармоніі пры падтрымцы Міністэрства культуры Рэспублікі Беларусь. Заснавальнік і мастацкі кіраўнік-дырэктар — Галіна Аляксееўна Дзягілева. Сваю гісторыю тэатр вядзе з 10 верасня 1990 года, калі ў Сафійскім саборы Полацка падчас Скарынаўскiх чытанняў адбылася прэм’ера спектакля «Выгнанне ў рай» паводле п’есы Н. Рапы, выкананага Дзягілевай. Афіцыйна зарэгістраваны 21 лютага 1991 года. У рэпертуар уваходзяць паэтычныя, драматычныя, лялечныя прадстаўленнi, а таксама першая беларуская монаопера «Адзінокі птах» А. Залётнева (лібрэта Дзягілевай), ладзяцца абанементныя спектаклі-сустрэчы з беларускімі паэтамі, пісьменнікамі, бардамі і артыстамі.

Тэатр не меў уласнай сцэны і працаваў на розных пляцоўках: у Нацыянальнай бібліятэцы Беларусі, на Малой сцэне Нацыянальнага акадэмічнага тэатра імя Янкі Купалы, Беларускім дзяржаўным акадэмічным тэатры юнага гледача, цэнтры «Каляндар», ІНВАЦэнтры. З 1995 года ажыццяўляў пастаноўкі ў Дольнай зале Касцёла Святога Сымона і Святой Алены, у кастрычніку 1999 года пры падтрымцы пробашча ксяндза-магістра Уладзіслава Завальнюка «Зніч» адкрыў у ім сваю тэатральную залу.

Тэатр «Зніч» прадстаўляў беларускае тэатральнае мастацтва ў Расіі, Украіне, Літве, Латвіі, Эстоніі, Польшчы, Германіі, ЗША і неаднаразова станавіўся прызёрам і лаўрэатам шматлікіх тэатральных фестываляў: «Студыйныя каляды» (Мінск, 1989); «У пачатку было слова…» (Перм, 1992), Міжнародны фестываль монаспектакляў «Я» (Мінск, 1993, 1996, 1998, 2004; Маладзечна, 2005); «Відлунне» (Кіеў, 2002), «Старая Руса» (Старая Руса, 2002); Міжнародны фестываль монаспектакляў «Адзін і ўсе» (Валгаград, 2004, 2007); Міжнародны тэатральны форум «Залаты Віцязь» (Мінск,2005; Масква, 2008); XIV Мінскі міжнародны кінафестываль «Лістапад» (17-24 лістапада 2007); Міжнародны фестываль «Марыя» (Кіеў, 2006, 2008, 2009, 2010, 2011); Міжнародны фестываль антычнага мастацтва «Баспорскія агоны» (Аўтаномная Рэспубліка Крым, 2007, 2008, 2009); Фестываль «МіМоКі» (Познань); Міжнародны фестываль «Белая Вежа» (Брэст, 2011, 2012).

У верасні 2022 года ўлады закрылі Чырвоным касцёл. З таго часу спэктакляў больш не праводзілася. У лютым 2023 года Галіну Дзягілеву адправілі на пенсію, пасля чаго калектыў спыніў існаванне .

Назва

«Зніч» — даўняя назва свяшчэннага агню. Для тэатра «Зніч» — гэта вобраз, нязгасны агонь мастацтва, «святло» лепшых узораў беларускай літаратуры і міравой класікі. Менавіта яны з’яўляюцца вытокам натхнення для стваральнікаў спектакляў тэатра.

Кіраўніцтва

Галіна Аляксееўна Дзягілева, заснавальнік і дырэктар — мастацкі кіраўнік (да 2023).

Акцёры тэатра

Спектаклі выконвалі вядомыя мінскія артысты:

• Галіна Дзягілева — лаўрэат міжнародных фестываляў
• Алесь Кашпераў — заслужаны артыст Рэспублікі Беларусь
• Ларыса Горцава — заслужаная артыстка Рэспублікі Беларусь
• Леанід Сідарэвіч — вядучы майстар сцэны
• Раіса Астрадзінава — вядучы майстар сцэны
• Вячаслаў Шакалідо — вядучы майстар сцэны
• Вячаслаў Статкевіч — спявак

Літаратура

• «Тэатральная Беларусь». — Мн., 2003.
• «Современная Беларусь» — Т.3. «Культура и искусство». — Мн., 2007.
• «Культура Беларуси». — Мн., 2010.

Спасылкі

• Вэб-старонка тэатра(недаступная спасылка) (бел.) (руск.)
• Пра тэатр
• Афіша тэатра і квіткі online
• Відэаролік пра тэатр
• Почему артист выходит из роли