Боўкінская абарона

Баявая аперацыя беларускіх партызан

Боўкінская абарона — баі партызанскага атрада «Трынаццаць», часткі сіл 15-га партызанскага палка, 17-й партызанскай брыгады, атрада «Перамога», падраздяленняў іншых атрадаў супраць нямецка-фашысцкіх захопнікаў 5—18 кастрычніка 1943 года ў лесе каля вёскі Боўкі Быхаўскага раёна.

Боўкінская абарона
Асноўны канфлікт: Вялікая Айчынная вайна
physical
'
'
Дата 5—18 кастрычніка 1943
Праціўнікі
Саюз Савецкіх Сацыялістычных Рэспублік партызанскі атрад «Трынаццаць»,
частка сіл 15-га партызанскага палка,
17-я партызанская брыгада,
атрад «Перамога»
Трэці рэйх Нямецкія акупацыйныя войскі і іх саюзнікаў

Ход абароны правіць

У пачатку кастрычніка гітлераўцы, каб ачысціць свае прыфрантавыя тылы, накіравалі каля 25 000 карнікаў супраць партызан і мірных жыхароў, якія знаходзіліся пад аховай партызан у міжрэччы Проні і Дняпра. Партызаны занялі абарону ў Гарадзецкім урочышчы за 4 км на поўдзень ад вёскі Боўкі. Да 10 кастрычніка гітлераўцы не змаглі прарвацца ў лес. 11 кастрычніка праціўнік сіламі 707-й пяхотнай дывізіі, 747-га, 442-га, 118-га, 87-га грэнадзёрскага, 260-га артылерыйскага з прыдадзенымі ахоўнымі і сапёрнымі батальёнамі, авіяэскадрылляй бамбардыроўшчыкаў, уклініўся ў абарону партызан, заняў вёскі Боўкі, Ветранка, Дабужа, Смаліца, Александрова, Жалезінка і завяршыў акружэнне. Пасля баёў 14 кастрычніка полк «Трынаццаць» і большая частка цывільнага насельніцтва адышлі ў глыб лесу і занялі абарону за 3,5 км на паўднёвы усход ад вёскі Смаліца. Партызаны 15-га палка і падраздзяленняў іншых атрадаў прарваліся ў заходнім напрамку. Праціўнік бесперапынна атакаваў пазіцыі палка «Трынаццаць». У партызан скончыліся харчы, засталося мала боепрыпасаў. 18 кастрычніка яны з боем прарвалі кальцо акружэння і выйшлі ў паўднёва-ўсходнім напрамку. За час блакады полк «Трынаццаць» правёў больш за 20 баёў, знішчыў больш за тысячу карнікаў. Партызаны страцілі каля 300 чалавек забітымі. У баях вызначыліся батальёны пад камандаваннем М. І. Масквіна, І. Т. Мацяша, П. І. Звяздаева, партызанскага палка «Трынаццаць», атрад «Перамога» і іншыя.

Памяць правіць

У гонар Боўкінскай абароны каля вёскі Дабужа ў 1966 годзе насыпаны Курган Бессмяротнасці.

Літаратура правіць

  • Л. М. Літвін. Боўкінская абарона // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш.. — Мн.: БелСЭ, 1990. — С. 88-89. — 680 с. — 20 000 экз. — ISBN 5-85700-012-2.