Гарыбальдчыкі

Гарыбальдчыкі або Легіён Гарыбальдзі — аддзел італьянскіх добраахвотнікаў, якія бралі ўдзел у Студзеньскім паўстанні 1863 года. Іхняй арганізацыяй займаўся сын Джузэпэ Гарыбальдзі — Меноці, а камандзірам быў Франчэска Нулья, які загінуў у адным з баёў на тэрыторыі Царства Польскага.

Гарыбальдчыкі
Гады існавання	1863
Краіна	Італія
Падпарадкаванне	Польшча
Тып	воінскае фарміраванне
Удзел у	бітва пад Кжыкаўкай

Дзейнасць

Прыхільнік польскіх паўстанцаў, Франчэска Нулья склікаў у Бергама ўсіх ахвотных. У красавіку 1863 года яго аддзел прыбыў у Кракаў. 3 мая італійцы перайшлі мяжу з Кангрэсавай Польшчы ля Крышавіцаў. Злучыўшыся з паўстанцкім аддзелам палкоўніка Юзафа Мінеўскага, яны ў той самы дзень разбілі расійскае войска пад Падлэмжамі.

5 мая адбылася бітва пад Кжыкаўкай, у якой гарыбальдчыкі атрымалі значныя страты, Франчэска Нулья і Юзаф Мінеўскі былі забіты, ад’ютант Нулья Элья Маркеці сканаў ад ран некалькі дзён пазней. Некаторыя італійцы трапілі ў палон і былі сасланы ў Сібір, астатнія здолелі вярнуцца ў Італію.

Уплыў

Большасць даследчыкаў ацэньваюць колькасць гарыбальдчыкаў у дваццаць чалавек, таму яны не аказалі вялікага ўплыву на хаду ваенных дзеянняў. Аднак сталі запамінальным прыкладам замежнай падтрымкі паўстанцаў. Цяпер імя Франчэска Нулья ці яго аддзела маюць шматлікія вуліцы і школы ў розных гарадах Польшчы.