Еўропа (атэль, Мінск)

«Еўропа» — пяцізоркавы гатэль, які знаходзіцца на вуліцы Інтэрнацыянальнай, 28 горада Мінска, адноўлены ў 2007 годзе.

Гатэль
Еўропа
53°54′09,63″ пн. ш. 27°33′26,18″ у. д.
Краіна	Беларусь
Месцазнаходжанне	Мінск
Архітэктурны стыль	мадэрн
Асноўныя даты
1884 — Рэканструкцыя пасля пажару і наданне сучаснага імя 1906—1908 — Перабудова ў стылі мадэрн 1944 — Знішчана ў час савецкага наступу 2007 — Адбудавана
Медыяфайлы на Вікісховішчы

Гісторыя

19 стагоддзе

Дарэвалюцыйная гасцініца была ўзведзена на сродкі Веньяміна Поляка і належала яму. Ён выхадзец з найбагацейшай мінскай купецкай дынастыі, сямейства Полякаў. Галоўны з іх — Майсей — быў саўладальнікам найбуйнейшай у Мінску банкірскай канторы «Вейсбрэм і Поляк» і некалькіх фанерных заводаў, вёў буйны гандаль воўнай і хлебам. У іншых Полякаў быў свой бізнес: Ізраіль зарабляў хлебам і будаўнічымі падрадамі, Абрам гандляваў лесам. Веніямін вядомы з 1890-х гадоў як гандляр каланіяльнымі таварамі.

У сярэдзіне XIX стагоддзя да паўночна-ўсходняй частцы гасцініцы быў прыбудаваны трохпавярховы корпус. Пасля пажару 1884 гасцініца была рэканструявана — вышыня ўсіх частак выраўнаваная да трох паверхаў — і стала называцца «Еўропа».

20 стагоддзе

Гатэль «Еўропа» і пачатак вуліцы Францысканскай. 1910

У 1906—1909 гг. «Еўропа» была перабудавана ў стылі мадэрн. Гэта было самае буйное грамадзянскае збудаванне дарэвалюцыйнага Мінска — шэсць паверхаў, 130 нумароў. Валодалі гасцініцай у той час браты — Рыгор і Якаў Полякі.

У 1913 г. у гасцініцы працавалі першакласны рэстаран А. Г. Саўлевіча, жаночая і мужчынская цырульня, чытальная зала. У кожным з 130 нумароў «Еўропы» былі тэлефон, рукамыйнік, электраасвятленне, вадзяное ацяпленне, ванна. Дзейнічаў ліфт. Да пад’ездаў заказваўся аўтамабіль альбо экіпаж.

Гасцініца была шасціпавярховым будынкам, з вылучанымі цэнтральнымі часткамі на бакавых фасадах і трыма спаранымі вокнамі ў цэнтральнай восі другога, трэцяга і чацвёртага паверхаў. На трэцім паверсе знаходзілася паўцыркульная арка-балкон, зверху ўпрыгожаная ляпнінай (балконы таксама размяшчаліся на другім-чацвёртым паверхах).

Будынак быў падзелены вертыкальнымі пілястрамі, якія аддзялялі кожнае акно ў агульны вертыкальны рад. Прастора паміж вокнамі верхніх паверхаў была аздоблена скульптурнымі элементамі — выявамі жаночых галовак, ляпнымі расліннымі матывамі. На другім паверсе вокны былі з замковымі камянямі. Будынак меў складаны фігурны карніз. Адметна выглядаў шосты паверх, пабудаваны з адступам ад карніза і багата аздоблены дэкаратыўнымі ляпнымі элементамі на атыку. На кожным фасадзе шосты паверх упрыгожваўся па цэнтры паўцыркульным фрызам. На канцы аднаго, бакавога, і большага фасадаў (другі паверх) меўся эркер.

19 лютага 1918 года, у часе акцыі вызвалення Мінска беларускімі і польскімі вайскоўцамі ад бальшавікоў, беларускія змагары ўварваліся ў гатэль, каб арыштаваць савецкага камісара Карла Ландара, а таксама чыноўнікаў мінскага штаба ЧК і Чырвонай арміі. Бальшавікі былі вымушаныя ўцякаць ад беларусаў праз тыльны выхад і хутка з’ехаць з горада. Здабыццё гатэлю было адным з галоўных дасягненняў беларусаў у беларуска-польскай антыбальшавіцкай акцыі.

Будынак быў разбураны летам 1944 года падчас другай сусветнай вайны ў выніку савецкага наступу на горад.

21 стагоддзе. Аднаўленне

15 красавіка 2004 года была прынятае рашэнне наконт аднаўлення гасцініцы «Еўропа». На рэканструкцыю гасцініцы і ператварэнне яе ў пяцізоркавы гатэль адводзілася два гады. Першых наведвальнікаў гасцініца прыняла ў 2007 годзе.

Нумарны фонд гасцініцы сёння ўключае 67 розных па катэгорыях нумароў.

У гатэлі «Еўропа» ёсць рэстаран, бар, аздараўленчы комплекс з басейнам, саўнай і фітнес-цэнтрам, дзве канферэнц-залы ўмяшчальнасцю на 70 і 25 чалавек, і падземны паркінг.

Спасылкі

• Афіцыйны сайт гатэля