Зміцер Сасноўскі

Зміцер (Дзмітрый Алегавіч) Сасноўскі (нар. 22 лістапада 1974, Гомель) — беларускі музыкант, гісторык, прадзюсар. Папулярызатар сярэднявечнай беларускай музыкі. Майстар старадаўніх музычных інструментаў.

Зміцер Сасноўскі
Дата нараджэння	22 лістапада 1974(1974-11-22) (49 гадоў)
Месца нараджэння	Гомель, Гомельская вобласць, БССР, СССР
Грамадзянства	Беларусь
Род дзейнасці	музыкант, гісторык, прадзюсар, стваральнік музычных інструментаў, дудар
Месца працы	Полацкі дзяржаўны ўніверсітэт імя Ефрасінні Полацкай ЗБС Бацькаўшчына Стары Ольса Дукорскі маёнтак
Альма-матар	гісторыка-юрыдычны факультэт ГДУ імя Ф. Скарыны (1996) Рэспубліканскі інстытут вышэйшай школы (1997)
Узнагароды	Нацыянальная музычная прэмія «Ліра» (2013)
Медыяфайлы на Вікісховішчы

Біяграфія

Нарадзіўся 22 лістапада 1974 года ў Гомелі. Вучыўся ў сярэдняй школе № 44 г. Гомель.

У 1996 годзе скончыў гісторыка-юрыдычны факультэт Гомельскага дзяржаўнага ўніверсітэта. У 1997 годзе скончыў Рэспубліканскі інстытут вышэйшай школы па спецыяльнасці «філасофія».

У 1996—2000 гадах выкладчык кафедры філасофіі і культуралогіі Полацкага дзяржаўнага ўніверсітэта. У 2000 годзе выкладчык сусветнай мастацкай культуры ў сярэдняй школе № 19 г. Гомеля. У 2001—2009 гадах загадчык інфармацыйнага аддзела Згуртавання беларусаў свету «Бацькаўшчына».

З 1999 года заснавальнік і лідар музычнага гурта сярэднявечнай музыкі «Стары Ольса».

Стажыраваўся ў 1998 годзе ў Мадрыдскім каталіцкім універсітэце «Comillas», навучаўся ў музычнага майстра Донатса Вуцыса ў Латвіі. Стажыраваўся ў Калегіуме Усходняй Еўропы ва Уроцлаве (2004), па Міжнароднай лідарскай праграме Дзяржаўнага дэпартамента ЗША (2006).

У 2009 годзе арт-дырэктар турыстычнага агенцтва «Гісторыя-тур», у 2007—2009 гадах адміністратар дударскага клуба. З 2001 года прадзюсар і арганізатар культурных і музычных мерапрыемстваў. З 2006 года прадзюсар «Дударскага фэста».

У 2015—2017 гадах загадчык гістарычнага музея Дукорскага маёнтка. З 2015 года займаецца арганізацыяй святаў як індывідуальны прадпрымальнік.

Зміцер Сасноўскі на пратэсце ў Мінску 30 жніўня 2020 года

У 2020 годзе браў удзел у пратэстах супраць фальсіфікацыі выбараў, гвалту і беззаконня. Быў затрыманы 13 лістапада, калі стаяў у ланцугу салідарнасці ў Клецку. Трое сутак да суда трымалі ў ІЧУ практычна без ежы, атрымаў штраф 30 базавых велічынь. Вымушаны быў з’ехаць за мяжу, бо яго шукалі невядомыя і пагражалі яму.

Навуковая дзейнасць

Напрамкі даследаванняў: гісторыя беларускай музычнай культуры, старадаўнія музычныя інструменты Беларусі.

Узнагароды

Лаўрэат міжнароднага фальклорнага фестывалю ў Паставах (1999), Нацыянальнай музычнай прэміі (2013).

Бібліяграфія

• Гісторыя беларускай музычнай культуры XIX—XX стст. Мінск, 2012.
• Музычная культура рыцарскага саслоўя Вялікага Княства Літоўскага і Каралеўства Польскага. Мінск, 2010.
• Гісторыя беларускай музычнай культуры ад першабытнасці да канца XVIII ст. Мінск, 2010.
• Гісторыя беларускіх музычных уплываў. Мінск, 2009.
• Дакументальны фільм «Старыя інструменты Беларусі» (2007)

Літаратура

• САСНОЎСКІ Зміцер Алегавіч // Сучасныя беларускія даследчыкі гісторыі Вялікага Княства Літоўскага : біябібліяграфічны даведнік / С. П. Марозаў. — Гродна-Каўнас: ЮрСаПрынт, 2022. — 290 с. — ISBN 978-985-7257-57-7, 978-609-96340-1-2.