Кашаніль польская (Porphyrophora polonica) — насякомае атрада раўнакрылых хобатных, сямейства маргарадзіды (Margarodidae)
Прадстаўнік політыпічнага роду. Адзін з 23 відаў роду ў сусветнай фаўне.
Імага вішнёва-чырвоныя. Самкі без крылаў і па форме цела нагадваюць маленькіх макрыц. Самцы крылатыя з доўгімі васковымі ніткамі на канцы брушка.
Вядома ў Польшчы, Украіне, Беларусі, у Тамбоўскай вобласці Расіі. Магчыма, распаўсюджана шырэй.
Месцы пражывання: лугі, узлескі, паляны з наяўнасцю ў раслінным покрыве сунічніку, дубровак, талакнянкі, мацярдушкі і інш.
Асаблівасці біялогіі
правіць
Зімуе ў стадыі лічынкі першага ўзросту ў глебе пад засцярогай васковага кокана, утворанага дарослай самкай. На раслінах з’яўляюцца ў траўні, потым уходзяць у глебу і кормяцца клетачным сокам каранёў дубровак, сунічніку, талакнянкі і іншых раслін. У другой палове ліпеня лічынкі пакрываюцца цвёрдай абалонкай. Прыкладна праз месяц з цыстаў выходзяць лічынкі самцоў і дарослыя самкі. Лічынкі самцоў хутка акукліваюцца і праз тыдзень з кукалак выходзяць дарослыя самцы. У Беларусі лёт самцоў і з’яўленне з цыстаў самак — у ліпені. Пасля спароўвання самцы гінуць, а аплодненыя самкі зарываюцца ў зямлю і абкружаюць сябе ватападобнымі васковымі выдзяленнямі. Яйкі (300—700) адкладвае ў жніўні.
З самак здабываюць рэчыва, якое выкарыстоўваецца для атрымання чырвонага фарбавальніка — карміну.
- Чырвоная кніга Рэспублікі Беларусь: Рэдкія і тыя, што знаходзяцца пад пагрозай знікнення віды жывёл і раслін. — Мн.: Беларуская Энцыклапедыя, 1993. ISBN 5-85700-095-5
