Майсей Гітлін
Майсе́й Гі́тлін (англ.: Moses Gitlin; 1897[1], Аляксандрава, Кіеўская губерня, Расійская імперыя — 10 студзеня 1969, Кліўлэнд, Агая, ЗША) — пратэстанцкі місіянер, рэлігійны і грамадскі дзеяч беларускага замежжа ў ЗША.
| Майсей Гітлін | |
|---|---|
| Род дзейнасці | місіянер |
| Дата нараджэння | 1896 або 1897 |
| Месца нараджэння | Аляксандрава, Кіеўская губерня, Расійская імперыя |
| Дата смерці | 10 студзеня 1969 |
| Месца смерці | Кліўлэнд |
| Жонка | Клара |
Біяграфічны нарыс
правіцьНарадзіўся 18 ліпеня 1896 года[2] (паводле іншых звестак, у 1897 годзе[1]). Паходзіў з беднай яўрэйскай сям’і, рана страціў бацьку. Пэўны час вучыўся ў хедары, пасля працаваў памочнікам майстра па пашыве галаўных убораў.
У 1912 пасля знаёмства з украінскім баптысцкім пастарам Кірычэнкам Майсей Гітлін прыняў хрысціянства. У 1913 эміграваў у ЗША да старэйшае сястры і пасяліўся ў Нью-Ёрку, дзе неўзабаве прыняў водны хрост. Працаваў па спецыяльнасці, у суботы займаўся місіянерскай працай сярод яўрэяў.
Пасля пераехаў у Філадэльфію, навучаўся ў агульнаадукацыйным універсітэце Тэмпл (1915—1920), потым у Біблейскім інстытуце Вільгельма Фэтлера (Філадэльфія), Біблейскім інстытуце Мудзі (Чыкага). Далучыўшыся да арганізаванага Фэтлерам Таварыства па евангелізацыі яўрэяў у ЗША і Канадзе, у 1921 заняўся місіянерскай дзейнасцю і пераехаў у Польшчу (Здалбунаў).
У 1922 узяў шлюб з Кларай, эмігранткай з СССР.
Да 1939 г. працаваў місіянерам у Польшчы, выкладаў на біблійных курсах, стварыў у мястэчку Радасць (цяпер раён Варшавы) біблійную школу.
Перад пачаткам вайны вярнуўся з сям’ёй у Амерыку, дзе прапаведаваў у славянскіх цэрквах ЕХБ у ЗША і Канадзе, выкладаў у Біблейскім інстытуце ў Таронта. У 1944—1945 арганізоўваў біблейскія школы ў Аргенціне і Канадзе. На працягу трох год у 1950-я быў пачэсным пастарам царквы Бэрвін у Чыкага і выкладаў Слова Божае.
З пачатку 1960-х супрацоўнічаў з беларускім эмігранцкім перыядычным друкам («Бацькаўшчына», «Беларус»), удзельнічаў у працы па перакладзе Бібліі на беларускую мову, быў сябрам Беларускага біблійнага камітэту.
Пахаваны на могілках у Кліўлэндзе.
Сям’я
правіцьМеў жонку Клару і прынамсі шэсць дзяцей[1].
Бібліяграфія
правіць- Нацыянальная свядамасць Апостала Паўлы. — [Toronto―Warszawa], 1983. — 12 с.
Зноскі
- ↑ а б в Moses Gitlin in the 1940 Census (англ.). Ancestry (6 лістапада 2012).
- ↑ Рэлігійныя дзеячы рускага замежжа (руск.)
Спасылкі
правіць