Новы мост (Гродна)
Новы мост (Паповічскі мост) — аўтамабільны і пешаходны мост праз Нёман у Гродне. Злучае вуліцы Паповіча і Вясеннюю. Быў пабудаваны ў 1971 годзе. У 2022–2023 гадах рэканструяваны. Канструкцыю трымаюць сем апор (2 берагавыя і 5 рэчышчавых). Вышыня над узроўнем Нёмана – 10,5 м, глыбіня апускання паль – 15 м. Прапускная здольнасць моста — больш за 3000 аўтамабіляў на суткі.[1]
| Новы мост | |
|---|---|
| Каардынаты: 53°40′45″ пн. ш. 23°48′23″ у. д.HGЯO | |
| Перасякае | Нёман |
| Месца размяшчэння | |
| Канструкцыя | |
| Агульная даўжыня | 301,2 м |
| Шырыня моста | 21 м |
| Вышыня скляпення над вадой | 10,5 м |
| Палос руху | 4 |
| Эксплуатацыя | |
| Канструктар, архітэктар | ГІП В.В.Рэвоцька |
| Адкрыццё | 1971 год |
| Зачыненне на рэканструкцыю | 10.10.2022–14.04.2023 |
Гісторыя правіць
У пач. ХХ стагоддзя праз Нёман у вайсковых мэтах праклалі драўляны мост у раёне сучасных вуліц Герасімовіча і Нёманскай. Дарога праз яго вяла да земляных фартоў. Мост праіснаваў прыблізна да сяр. 1920-х гадоў. Яго двойчы руйнавалі, рэшткі паляў можна пабачыць дагэтуль.
У другой пал. 1960-х гадоў чыноўнікі вырашылі збудаваць мост у раёне вуліцы Паповіча. Будаўніцтвам займаўся «Мостаатрад-58». Працы ішлі павольна. Мост здалі ў эксплуатацыю ў 1971 годзе. Берагі добраўпарадкавалі, з кожнага боку моста арганізавалі спускі да ракі для пешаходаў. Бэлькі Новага моста паміж сабой былі злучаныя так, што мусілі рухацца адна адносна адной. Таму мост увесь час знаходзіўся ў руху.
Побач з мостам на момант пабудовы была пракладзена траса для матацыклетных гонак, на левым беразе Нёмана месцяцца найстарэйшыя яўрэйскія могілкі.
Першапачаткова мост назвалі «Мост Будаўнікоў»: планавалася, што на яго выйдзе працяг праспекта Будаўнікоў. Ён мусіў стаць часткай «Паўночна-Заходняга» кола вакол Гродна. Кола не сфармавался і назва моста не прыжылася. Яго называлі проста «новы мост».[2]
Рэканструкцыя правіць
Пра патрэбу рамонту Новага моста казалі яшчэ ў 2010 годзе, але тады проста памянялі асфальт. Паводле абследаванняў, допуск эксплуатацыі моста мусіў скончыцца ў снежні 2022 года.[3]
Капітальны рамонт Новага моста пачалі ў кастрычніку 2022 года і скончылі ў красавіку 2023. На час прац на абодвух берагах Нёмана арганізавалі часовыя прыпынкі грамадскага транспарту. Ён даязджаў да моста і разварочваўся. Для пешаходаў уладкавалі пантонную пераправу праз Нёман.[4] У час рамонту ранейшую канструкцыю аб'ядналі ў неразрэзнае пралётнае збудаванне.[5]
Фактычна на момант рэканструкцыі Новы мост быў найстарэйшым мостам Гродна: Румлёўскі мост узвялі ў 1986-м, а Стары мост перажыў сур'ёзную рэканструкцыю ў 2000-х.[6]
У працах на мосце былі задзейнічаныя 180 спецыялістаў з 15 арганізацый і прадпрыемстваў, 105 адзінак тэхнікі, выкарыстана 4000 тон будматэрыялаў, 8000 м² гідраіазляцыі, спецыяльны рэцэпт асфальтабетону.[1]
Пасля рамонту мост стаў чатырохпалосным. Тэрмін эксплуатацыі да наступнага рамонту павінен скласці не менш за 25 гадоў.[7]
Зноскі правіць
- ↑ а б Пул 4 Регион. Telegram. Праверана 15 лютага 2024.
- ↑ Драўляны вайсковы масток, штучная выспа і мотакрос: гісторыя Новага моста, які ўзяліся рамантаваць упершыню за паўстагоддзя (руск.). Hrodna.life - русская версия (15 лютага 2024). Праверана 15 лютага 2024.
- ↑ Судьба Нового моста в Гродно решена – последние новости(нявызн.). Автомобили Гродно (7 кастрычніка 2022). Праверана 15 лютага 2024.
- ↑ У Гродне - новая фотазона. Як гараджане сустрэлі пантонны мост . Hrodna.life (7 лістапада 2022). Праверана 15 лютага 2024.
- ↑ Капитальный ремонт моста по ул. Поповича в г. Гродно — Белгипродор (руск.). Праверана 15 лютага 2024.
- ↑ В Гродно торжественно открыли мост после капремонта — с фейерверком и странным шоу а-ля СССР: посмотрите (руск.). Зеркало (14 красавіка 2023). Праверана 15 лютага 2024.
- ↑ NewGrodno. Еще немного и асфальт! Новый мост в Гродно готовится к открытию (руск.). NewGrodno.By (29 сакавіка 2023). Праверана 15 лютага 2024.