Салата (страва)

Сала́та (ад італ.: insalata) — халодная страва (у сучаснай кухні існуюць і гарачыя салаты), якую гатуюць з сумесі гародніны (лісце салаты, розная зеляніна, бульба, грыбы, агуркі, бабы, садавіна і г.д.), прыпраўляюць воцатам, алеем, маянэзам, смятанай, лімонным сокам, соллю, перцам або спецыяльнымі салатнымі запраўкамі; падаюць пераважна да смажанага мяса, часам у выглядзе закускі (hors d'oeuvre). Гатуюць салаты звычайна непасрэдна перад падачай на стол.

Румынская салата

Звычай есці салату быў у рымлян, якім былі вядомы салаты з эндывія, булёну, аліўкавага алею, цыбулі, мёду і воцату. У Сярэднявеччы салаты рабілі з цыбулі, часнаку, перачнай мяты і пятрушкі.

Салата — страва ў выглядзе сумесі разнастайных здробненых (нарэзаных, нацёртых і г. д.) прадуктаў — напрыклад, сырная салата, якая складаецца з цёртага сыру, вараных яек і маянэзу або смятаны, якая можа не змяшчаць гародніны. Селядцовая салата — сумесь нарэзанай гародніны з селядцом (найбольш вядомая як «селядзец пад шубай»). Як салаты вядомы таксама рознага роду стравы, якія робяць пераважна з мяса, рыбы, каўбасы, дзічыны, ракаў, кальмараў і інш. з соллю, воцатам і алеем і запраўленыя якім-небудзь пікантным соусам (маянэз і інш.): гэта так званыя грэчаскія і польскія салаты. Адной з самых папулярных салатаў гэтага віду з'яўляецца «салата Аліўе».

Адна з найпапулярнейшых салатаў — вінегрэт.