Сяроўка (Бранская вобласць)

Сяроўка (руск.: Серовка) — сяло ў Злынкаўскім раёне Бранскай вобласці, у складзе Спірыдонавабудскага сельскага паселішча. Размешчана за 9 км на поўдзень ад сяла Спірыдонава Буда. Насельніцтва — 24 чалавека (2010).

Сяло Сяроўка Краіна Расія Суб’ект федэрацыі Бранская вобласць Муніцыпальны раён Злынкаўскі Сельскае паселішча Спірыдонавабудскае Каардынаты 52°12′08″ пн. ш. 31°45′54″ у. д. Першая згадка XVIII стагоддзе Насельніцтва 24 чалавекі (2010) Часавы пояс UTC+4 Тэлефонны код +7 48358 Паштовы індэкс 243611 Аўтамабільны код 32 Код АКАТП 15223824002 Сяроўка на карце Расіі ±

У сяле захаваўся мураваны храм Міхаіла Архангела (пабудаваны ў 1801 годзе, цяпер не дзейнічае).

Гісторыя

Згадваецца з XVIII стагоддзя; пасля першага падзелу Рэчы Паспалітай у 1772 годзе ў складзе Расійскай імперыі. Уваходзіла ў склад Магілёўскай (з 1919 — Гомельскай) губерні, у тым ліку з 1861 года — у складзе Стараюркавіцкай воласці Гомельскага павета. Да пачатку XX стагоддзя былі развіты кравецкае і шавецкае рамёствы; з 1871 дзейнічала прыватная алейня.

10 кастрычніка 1904 у сяле быў урачыста асвячоны новы будынак народнага вучылішча.

З 1923 года ў Чуравіцкай воласці Навазыбкаўскага павета.

У паведамлянні, якое датуецца вераснем 1926 года, згадваецца, што «выслухаўшы даклад т. Лапіцкага і чытанне беларускай літаратуры, актыў вёскі Сяроўка [далей пералік асобаў] пацвярджае, што жыхары нашай вёскі размаўляюць на беларускай мове, падобнай да той, на якой напісаны прачытаны нам верш і артыкулы, і што навучанне нашых дзяцей на роднай мове павінна быць нашмат лягчэйшым. Таму актыў лічыць патрэбным ажыццявіць перавод школы, пачынаючы з першага класа, на беларускую мову». Акрамя таго, вяскоўцы прасілі адчыніць хату-чытальню, якая б дзейнічала на беларускай мове і была б забяспечана беларускімі літаратурай і газетамі, а таксама прыслаць ізбача (г. зн. супрацоўніка хаты-чытальні), які добра валодаў бы беларускай мовай.

У 1929—1932 у Чуравіцкім раёне, у 1932—1939 і 1959—1988 — у Навазыбкаўскім; у 1939—1959 і з 1988 года па цяперашні час — у Злынкаўскім раёне.

З 1919 да 1930-х гг. з’яўлялася цэнтрам Сяроўскага сельсавета, затым да 2005 года ўваходзіла ў Кажаноўскі сельсавет (у 1954—1959 часова ў Пятрацінскім сельсавеце).

Гады	1878	1897	1926	1979	1989	2002	2010
Насельніцтва	1123	1592	1308	148	106	52	24

Літаратура

• Населённые пункты Брянского края. Энциклопедический словарь. — Изд. 2-е, дополненное и исправленное. — Брянск: Десяточка, 2012. — С. 376. — 468 с. — 700 экз. — ISBN 978-5-91877-090-0.