Чапля белая малая (Egretta garzetta) — сярэдняга памеру балотная птушка сямейства чаплевых, шырока распаўсюджаная ў цёплым клімаце ўсходняга паўшар'я. Пачынаючы з другой паловы XX стагоддзя актыўна засяляе Паўночную і Цэнтральную Амерыку.
Знешне падобная да вялікай белай чаплі, адрозніваецца ад яе меншымі памерамі, падоўжаным пер'ем на патыліцы і грудзях, і дэталямі афарбоўкі дзюбы і ног. Трымаецца паблізу розных вадаёмаў са стаячай або праточнай вадой; засяляе пойменныя лясы ў далінах рэк, плыткія азёры з зарослымі берагамі, балоты, заліўныя рысавыя палі. Не баіцца чалавека і часта сустракаецца каля жылля і на пашах. Гняздуе калоніямі, часта сумесна з бакланамі або іншымі чаплямі. Сілкуецца ў асноўным дробнай рыбай, а таксама казуркамі, жабамі, слімакамі і да т.п. У Еўропе пералётная птушка, зімуе на берагах Міжземнага мора, у Афрыцы і ў трапічнай Азіі.
