Адзіная спартыўная класіфікацыя Рэспублікі Беларусь

Адзіная спартыўная класіфікацыя Рэспублікі Беларусь (АСК) — нарматыўны дакумент, які вызначае парадак прысваення і пацверджання спартыўных званняў і разрадаў у Рэспубліцы Беларусь. Вызначае нормы, выкананне якіх неабходна для прысваення званняў і разрадаў для ўсіх афіцыйна прызнаных відаў спорту. АСК распрацоўваецца і прымаецца тэрмінам на чатыры гады.

Агульныя палажэнні

АСК з’яўляецца адзіным нарматыўным дакументам, які вызначае парадак прысваення афіцыйных спартыўных званняў і разрадаў і патрабаванні да спартсменаў, якія прэтэндуюць на гэтыя званні.

АСК вызначае як уласна нарматывы, якія павінен выканаць спартсмен для атрымання звання, так і ўмовы, у якіх гэтыя нарматывы павінны выконвацца: узровень спаборніцтваў, кваліфікацыю суддзяў, узровень супернікаў. Патрабаванні ўстанаўліваюцца індывідуальна для кожнага віду спорту, з улікам як яго спецыфікі, так і ўзроўню развіцця гэтага віду ў Рэспубліцы Беларусь.

Віды спорту

У АСК уключаюцца наступныя віды спорту:

• уключаныя ў праграму Алімпійскіх, Паралімпійскіх, Дэфлімпійскіх гульняў;
• не ўключаныя ў праграму Алімпійскіх, Паралімпійскіх, Дэфлімпійскіх гульняў, але прызнаныя Міжнародным алімпійскім камітэтам;
• не ўключаныя ў праграму Алімпійскіх, Паралімпійскіх, Дэфлімпійскіх гульняў і не прызнаныя Міжнародным алімпійскім камітэтам;
• спартыўна-тэхнічныя і ваенна-прыкладныя віды спорту (службовае мнагабор’е), якія развіваюць рэспубліканскія дзяржаўна-грамадскія аб’яднанні «Добраахвотнае таварыства садзейнічання арміі, авіяцыі і флоту Рэспублікі Беларусь», "Беларускае фізкультурна-спартыўнае таварыства «Дынама», дзяржаўная установа «Спартыўны камітэт Узброеных Сіл Рэспублікі Беларусь».

Разрады і званні

Сістэма спартыўных званняў і разрадаў з’яўляецца адзінай для ўсіх відаў спорту. Прадугледжваюцца наступныя званні і разрады спартсменаў (у парадку змяншэння):

Спартыўныя званні:

• Майстар спорту Рэспублікі Беларусь міжнароднага класа (МСМК)
• Майстар спорту Рэспублікі Беларусь (МС)
• Майстар спорту Рэспублікі Беларусь міжнароднага класа сярод інвалідаў (МСМК сярод інвалідаў)
• Майстар спорту Рэспублікі Беларусь сярод інвалідаў (МС сярод інвалідаў)

Спартыўныя разрады:

• Кандыдат у майстры спорту Рэспублікі Беларусь (КМС)
• 1-ы спартыўны разрад
• 2-і спартыўны разрад
• 3-і спартыўны разрад
• 1-ы юнацкі разрад
• 2-і юнацкі разрад
• 3-і юнацкі разрад
• кандыдат у майстры спорту Рэспублікі Беларусь сярод інвалідаў (КМС сярод інвалідаў)
• I разрад сярод інвалідаў
• II разрад сярод інвалідаў
• III разрад сярод інвалідаў
• 1-ы юнацкі разрад сярод інвалідаў
• 2-і юнацкі разрад сярод інвалідаў
• 3-і юнацкі разрад сярод інвалідаў

Патрабаванні і парадак прысваення званняў

• Званні МСМК і МС па відах спорту прысвойваюцца Міністэрствам спорту і турызму Рэспублікі Беларусь па прадстаўленні ўпраўленняў фізічнай культуры, спорту і турызму абласных, Мінскага гарадскога выканаўчых камітэтаў; па спартыўна-тэхнічных і ваенна-прыкладных відах спорту (службовых мнагаборствах) — па прадстаўленні БФСТ «Дынама», Спартыўнага камітэта Узброеных Сіл Рэспублікі Беларусь, ДТСААФ, узгодненым з рэспубліканскімі федэрацыямі (саюзамі, асацыяцыямі) па віду (відах) спорту.
• Званні МСМК сярод інвалідаў, МС сярод інвалідаў прысвойваюцца Міністэрствам спорту і турызму па прадстаўленні Федэрацыі фізічнай культуры і спорту Беларускага таварыства інвалідаў па зроку, Беларускай федэрацыі фізічнай культуры і спорту інвалідаў і Беларускай спартыўнай федэрацыі глухіх.
• Спартыўныя званні прысвойваюцца толькі грамадзянам Рэспублікі Беларусь.