Архіў Паўднёва-Заходняй Расіі

«Архіў Паўднёва-Заходняй Расіі» (руск.: Архив Юго-Западной России, издаваемый Комиссией для разбора древних актов, состоящей при Киевском, Подольском и Волынском генерал-губернаторе) — зборнік дакументаў і літаратурных помнікаў Правабярэжнай і Заходняй Украіны XIV—XVIII стст. Выдадзены ў Кіеве на рускай мове ў 35 т. (ч. 1—8, 1859—1914). Асноўная крыніца выдання — Кіеўскі цэнтральны архіў, дакументы, што паступалі ў Кіеўскую камісію ад прыватных асоб, манастыроў і розных устаноў. Уключаны матэрыялы па гісторыі праваслаўнай царквы XIV—XVIII стст., пратаколы і пастановы шляхецкіх сеймікаў за 1569—1726 гады, звесткі пра барацьбу ўкраінскага казацтва з польскай шляхтай у 1500—1768 гадах, акты аб паходжанні шляхецкіх родаў, пра гарады, дакументы аб эканамічным і юрыдычным становішчы ўкраінскіх сялян 1498—1799 гадоў, перапісы яўрэйскага насельніцтва і інш.

Літаратура

• Беларуская энцыклапедыя: У 18 т. Т. 1: А — Аршын / Рэдкал.: Г. П. Пашкоў і інш. — Мн. : БелЭн, 1996. — Т. 1. — 552 с. — 10 000 экз. — ISBN 985-11-0035-8. — ISBN 985-11-0036-6 (т. 1).