Віктар Алегавіч Катоўскі
Віктар Алегавіч Катоўскі (нар. 9 мая 1990) — бас-гітарыст гурта TerraKod. Палітычны зняволены, абвінавачаны і асуджаны за каментары па справе Зельцэра[1].
| Віктар Катоўскі | |
|---|---|
| Поўнае імя | Віктар Алегавіч Катоўскі |
| Дата нараджэння | 9 мая 1990 |
| Краіна |
 Беларусь |
| Музычная дзейнасць | |
| Прафесіі | музыкант |
| Гады актыўнасці | 2010 — цяперашні час |
| Інструменты | бас-гітара |
| Жанр | фолк-метал |
| Калектыў | TerraKod |
Біяграфія
правіцьУдзельнік гурта TerraKod. Разам з гуртом удзельнічаў у розных фэстах Беларусі і замежжа: Свята Сонца, Men-s Fest, Rockowisko Hajnówka; граў канцэрты разам з Gods Tower, TT-34, Jinjer, Sciana, Re1ikt, Zolki Band і іншымі гуртамі.
Палітычны пераслед 2020—2022
правіцьПасля забойства ў кватэры на вуліцы Якубоўскага ў Мінску 28 верасня 2021 супрацоўнікамі КДБ IT-спецыяліста Андрэя Зельцэра, падчас якога таксама загінуў супрацоўнік КДБ Федасюк, Следчым камітэтам Беларусі былі распачаты крымінальныя справы на падставе ацэначных каментароў у інтэрнэце наконт гэтага здарэння і асобы Федасюка. Ужо 6 кастрычніка Следчы камітэт паведаміў, што маецца 136 падазраванных па гэтай справе, усе яны нібыта былі затрыманы[2]. Сярод затрыманых быў таксама Віктар Катоўскі, паведамленне пра яго затрыманне з’явілася 30 верасня[3], пазней стала вядома, што Віктар праходзіць па крымінальнай справе адразу па тром артыкулам Крымінальнага кодэксу: ч. 1 арт. 368 (Абраза прэзідэнта Рэспублікі Беларусь), арт. 369 (Абраза прадстаўніка ўлады) і ч. 1 арт. 130 (Распальванне сацыяльнай варожасці), пасля затрымання знаходзіўся спачатку ў ІЧУ на Акрэсціна, пасля быў пераведзены ў брэсцкі СІЗА-7.
6 кастрычніка 2021 шэраг беларускіх праваабарончых арганізацый, сярод якіх Праваабарончы цэнтр «Вясна», Беларускі Хельсінкскі камітэт і Беларускі ПЭН-цэнтр, прызналі палітвязнямі 73 чалавека з ліку тых, хто быў затрыманы і абвінавачаны па «справе Зельцэра», Віктар Катоўскі таксама быў прызнаны палітычным зняволенным. Праваабаронцы адзначалі, што «затрыманыя па гэтай справе знаходзяцца ў неналежных умовах, іх працэсуальныя правы, у тым ліку права на абарону, паўсюдна парушаюцца», у заяве таксама была чарговы раз выказана пазіцыя праваабаронцаў наконт неабходнасці дэкрыміналізацыі адказнасці па дыфамацыйных артыкулах, а таксама падкрэслена селектыўнае і дыскрымінацыйнае ўжыванне крымінальнай адказнасці да крытыкаў прадстаўнікоў улады і супрацоўнікаў органаў унутраных спраў[4].
Прысуд па крымінальнай справе Віктара Катоўскага быў вынесены 14 красавіка 2022 у Брэсцкім абласным судзе. Па сукупнасці трох артыкулаў за тры допісы Катоўскага суддзя Мікалай Грыгаровіч па запыце пракурора Пакалы пастанавіў пакараць музыку пазбаўленнем волі тэрмінам на тры гады ў калоніі агульнага рэжыму і штрафам у памеры 100 базавых велічынь (3200 рублёў), менавіта столькі, колькі запрасіла абвінавачанне на папярэднім пасяджэнні 12 красавіка[5].
Зноскі
- ↑ ВІКТАР КАТОЎСКІ (бел.)
- ↑ СК: За каментары пра забітага супрацоўніка КДБ затрыманыя 136 чалавек (бел.)
- ↑ Задержан бас-гитарист TerraKod (руск.)
- ↑ Заява аб прызнанні 73 чалавек, затрыманых па «справе Зельцэра», палітзняволенымі (бел.)
- ↑ Тры гады калоніі і 100 базавых штрафу прысудзілі бас-гітарысту гурта TerraKod Віктару Катоўскаму (бел.)
Спасылкі
правіць