Дом майстра (Гродна)

Дом майстра, вядомы таксама як дамок або «домік» рамесніка — помнік архітэктуры барока ў Гродна, адзіны ацалелы ўзор першай на Беларусі комплекснай тыповай жыллёвай забудовы. Знаходзіцца па адрасе вуліца Элізы Ажэшкі, 37.

Жылы дом
Дом рамесніка
53°41′06″ пн. ш. 23°50′36″ у. д.
Краіна	Беларусь
Горад	Гродна
Архітэктурны стыль	барока
Архітэктар	Іаган Мёзер
Дата пабудовы	1765 год
Статус	Гісторыка-культурная каштоўнасць Беларусі, шыфр 412Г000005
Медыяфайлы на Вікісховішчы

Бакавы фасад

Пабудаваны каля 1765 года ў шэрагу 20 так званых «Басняцкіх дамоў», узведзеных па двух тыпавых праектах архітэктара Іагана Мёзера на тэрыторыі Гарадніцы сіметрычна абапал вуліцы Раскошы. Дамы прызначалася як для баснякоў, так і для запрошаных Антоніем Тызенгаўзам замежных майстроў. Дамы былі аднапавярховымі, прамавугольнымі ў плане, будаваліся з драўляных брусоў і цэглы. Гродзенскія басняцкія дамы блізкія да пастаўскіх і шаўляйскіх, але троху меншыя і прасцейшыя дэкорам і планіроўкай.

Галоўны фасад Дома рамесніка ўзведзены з цэглы і атынкаваны, завершаны складаным франтонам, невялікія вокны размешчаны сіметрычна. Астатнія сцены і перакрыцці драўляныя. Дах двухсхільны, пакрыты дахоўкай. Унутраная прастора будынка падзелена на вытворчую і жылую часткі.

У 1990 годзе адрэстаўраваны паводле праекта архітэктара У. Барсукова. Цяпер у будынку размешчана частка Музея гісторыі Гарадніцы — Дом рамёстваў.

Літаратура

• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, [1984—1988].
• Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5.

Спасылкі

• Дом майстра (Гродна) на сайце Глобус Беларусі (руск.)