Дэні Вільнёў

Дэні Вільнёў (фр.: Denis Villeneuve; нар. 3 кастрычніка 1967) — франка-канадскі кінарэжысёр і сцэнарыст. Выхадзец з колаў незалежнага кіно, у 2010-я ён зняў шэраг паспяховых трылераў («Палонніцы», «Забойца», «Вораг»), а з канца 2010-х перайшоў да жанру навуковай фантастыкі («Прыбыццё», «Бягун па лязе 2049», «Дзюна»), у якім дамогся найбольшай вядомасці. Нават у сваіх позніх, буйнабюджэтных праектах Вільнёў працягвае выкарыстоўваць прыёмы медытатыўнага незалежнага кіно, і гэты стыль прынёс яму павагу ад кінакрытыкаў і нямала ўзнагарод.

Дэні Вільнёў
фр.: Denis Villeneuve
Дата нараджэння	3 кастрычніка 1967(1967-10-03) (56 гадоў)
Месца нараджэння	Беканкур[d], Беканкур[d], Цэнтральны Квебек[d], Квебек, Канада
Грамадзянства	Канада
Дзеці	Саламэ Вільнёў[d]
Адукацыя	Універсітэт Квебека ў Манрэалі[d] Семінарыя Сен-Жазеф у Труа-Рыўер[d]
Прафесія	кінарэжысёр, сцэнарыст, кінапрадзюсар
Узнагароды	кампаньён Ордэна мастацтваў і літаратуры Квебека[d] (2016) Прэмія генерал-губернатара па выканальніцкіх відах мастацтва і мультымедыя[d] (2011) Джыні (2001) Прэмія Х’юга (2017)
IMDb	ID 0898288
Медыяфайлы на Вікісховішчы

У пачатку кар’еры ён выйграў маладзёжны кінаконкурс «Радыё-Канада» ў 1990—1991 гадах. Тройчы заваёўваў найвышэйшую нацыянальную кінапрэмію Канады «Джыні» за найлепшую рэжысуру: «Вір» (2000), «Палітэх» (2010) і «Пажары» (2011). У 2010 годзе яго фільм «Пажары» прадстаўляў Канаду на 83-й цырымоніі ўручэння ўзнагарод «Оскар» у катэгорыі «Найлепшы фільм на замежнай мове». У студзені 2011 года Дэні Вільнёў быў уключаны ў спіс 10 самых шматабяцальных маладых рэжысёраў на думку штотыднёвіка Variety.