Суражскі пахаваны выступ

Суражскі пахаваны выступ — тэктанічная структура, адноснае падняцце фундамента на заходнім перыклінальным замыканні Варонежскай антэклізы. Назва ад горада Сураж (Бранская вобласць).

Тэктанічныя структуры Беларусі

Размешчаны на ўсходзе Гомельскай вобласці Беларусі і на паўночным захадзе Бранскай вобласці Расіі. Выцягнуты па лініі Чачэрск — паўночней Суража — Клятня (Бранская вобласць). На поўначы мяжуе са Жлобінскай седлавінай і Аршанскай упадзінай, на поўдні—паўднёвым усходзе па разломе сучляняецца з Клінцоўскім грабенам, на паўночным усходзе паступова пераходзіць у цэнтральную частку Варонежскай антэклізы.

Паверхня фундамента апушчана па восевай лініі Суражскага пахаванага выступа ў паўднёва-заходнім напрамку ад −0,31 да −0,6 км. Найбольш прыўзнятая частка яго на паўднёвым захадзе называецца Краснагорскім падняццем, у скляпенні якога фундамент залягае на адзнаках вышэй −0,3 км. Платформавы чахол складзены з сярэднерыфейскіх, ніжнявендскіх, сярэднедэвонскіх, юрскіх, мелавых і антрапагенавых адкладаў.

Залажэнне выступу звязана з утварэннем Аршанскай упадзіны і Клінцоўскага грабена ў сярэднерыфейскі час.

Літаратура

• Суражскі пахаваны выступ // Энцыклапедыя прыроды Беларусі. У 5-і т. Т. 5. Стаўраструм — Яшчур / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1986. — 583 с., іл. — 10 000 экз.