BN

BN (:B:N:, «Бяз назвы») — беларускі рок-гурт з Бярозы.

:B:N:
Бяз Назвы
Выступ :B:N: на «Басовішчы»-2007
Асноўная інфармацыя
Жанр	Рок Альтэрнатыўны рок
Гады	1999 - па сённяшні дзень
Краіна	Беларусь
Горад	Бяроза, Мінск
Мова песень	беларуская
Склад	Алесь Лютыч Павал Яноўскі Віталь Дзмiтрэвiч Зміцер Харытановіч Данiла Лях Сяргей Машковіч
Былыя ўдзельнікі	Максім Шолахаў Рамуальд Пазняк Алесь Зайцаў Максім Літвінец Юрась Бардоўскі Алесь Сіліцкі
Медыяфайлы на Вікісховішчы

Гісторыя

Гурт заснаваны ў 1999 годзе. Музыку для гурту піша гітарыст ды спявак Алесь Лютыч. Пераможцы фэсту Басовішча ў 2002 годзе. У тым жа годзе быў запісаны дэма-альбом «Праз сябе», частка песень з якога ўвайшла ў першы альбом «Не трывай» (2004). У 2004 годзе прымалі ўдзел у тэлефестывалі «На скрыжаваннях Еўропы». Удзельнічалі ў якасці гасцёў на фестывалях Басовішча ў 2004—2007, 2009 гадах, «РОКавая Восень-2008», а таксама ў фэсце «NO LOGO FEST» у Віцебску (2009). 24 чэрвеня 2010 года гурт выпусціў інтэрнэт-сінгл «Жыццё маё», які з’яўляецца адным з этапаў напісання новага альбома. У 2012 годзе, пасля працяглага часу маўчання, быў выдадзены доўгачаканы альбом «Крок за крокам», які ўключае ў сабе 15 кампазіцый. Афіцыйная прэзентацыя дадзенага альбома адбылася 10 кастрычніка 2012 года канцэртам у мінскім клубе «Re:Public». Пачатак 2013 года адзначыўся прыхільнасьцю гурта да акустычнага выканання сваіх песень, выданнем акустычнага сінгла «Не трывай» і акустычным канцэртам у малой зале КЗ «Мінск» напярэдадні дня ўсіх закаханых. 17 красавіка бярозаўскі гурт прадставіў на Еўрарадыё першую частку запісанай акустычнай версіі сваіх кампазыцый, якая ўключала ў сабе 6 песень. 6 мая 2013 года гурт прымаў удзел у музычным фестывалі пад назвай «Дзень Радыё», які адбыўся ў сталічным клубе Рэ:Паблік і быў арганізаваны Еўрарадыё. У 2015 годзе ўбачыў свет новы студыйны альбом «Шукай сваё».

Дыскаграфія

Альбомы

• Праз сябе (2002)
• Не трывай (2004)
• Žyvie Rock'n'Roll (2006)
• Крок за крокам (2012)
• Акустыка (EP) (2013)
• PIANO (EP) (2014)
• Шукай сваё (2015)

Сінглы

• «Загінулым паэтам прысьвячаецца (feat. Лявон Вольскі)» (2008)
• «Жыццё маё» (2010)
• «Будзь сабой» (2011)
• «Не трывай (акустыка)» (2013)
• «Палюсы, Вяртаньне» (2013)
• «Хвалі» (2016)

Удзел у зборніках

• Viza Незалежнай Рэспублікі Мроя (2003) — «Дзед Мароз»
• Наша музыка 1 (2003) — «Не трывай»
• Генералы айчыннага року (2004) — «Гарады»
• Прэм’ер Тузін 2005 (West Records, 2005) — «Спіралі»
• Песьні свабоды-2 (VoliaMusic, 2006) — «Цягнік»
• Дыхаць! (2006) — «Моднікі»
• Песьні свабоды-3 (2007) — «Быў час…»
• Прэм’ер Тузін 2007 (2008) — «Daždžami»
• НезалежныЯ (2008) — «Загінулым паэтам прысвячаецца…»
• Права маладых (2010) — «Гузік» (кавер на песню гурта Нейра Дзюбель)

Удзельнікі

• Алесь Лютыч: гітара, спеў
• Юрась Бардоўскі: гітара
• Алесь Сіліцкі: бас-гітара
• Сяргей Машковіч: тэксты
• Зміцер Харытановіч: ударныя, перкусія

Былыя ўдзельнікі

• Максім Шолахаў: бас-гітара
• Рамуальд Пазняк: ударныя
• Алесь Зайцаў: бас-гітара
• Максім Літвінец: гітара

Відэакліпы

• «Канюшня» (2006)
• «Цягнік» (2007)
• «Дажджамі», рэж. — Р. Бвашчак, «Белсат» (2007, прэмія «Кліп-Марафон-2008» у намінацыі «Найлепшая альтэрнатыва»)
• «Крылы» (2008, зняты ў межах тэлепраекту «Выдатная сямёрка»)
• «Žyvie Rock'n'Roll» (2008)
• «Попел» (2014, прэзентаваны ў клюбе Re:Public падчас канцэрта, прысвечанага 15-годзьдзю гурта)
• «Вяртаньне» (2015)

Таксама існуе шэраг відэаролікаў, запісаных падчас жывых выступаў («Табе ўсё мала», «Дзяўчына», «Загінулым паэтам прысвячаецца» ды іншыя).

Літаратура

• Г.Ш. «B.N.» («Biaz Nazvy») // Энцыклапедыя беларускай папулярнай музыкі (бел.) / уклад. Дз. Падбярэзскі і інш. — Мінск: Зміцер Колас, 2008. — С. 49–50. — 368 с. — 2 000 экз. — ISBN 978-985-6783-42-8.

Спасылкі

• Афіцыйная старонка (да 2005)
• Афіцыйная старонка (копія з web.archive.org)
• Алесь Лютыч: «Цяпер :B:N: стала слухаць мая матуля» Архівавана 4 мая 2013.
• Прэзентацыя на Еўрарадыё: «Акустыка» ад :B:N:, частка 1