Іван Платонавіч Крэнь

Іван Платонавіч Крэнь (30 лістапада 1936, Ярашова, цяпер в. Кузявічы, Баранавіцкі раён — 4 мая 2014, Гродна) — беларускі гісторык.

Іван Платонавіч Крэнь
Дата нараджэння	30 лістапада 1936(1936-11-30)
Месца нараджэння	Ярашова, Слонімскі павет, Навагрудскае ваяводства, Польская Рэспубліка
Дата смерці	4 мая 2014(2014-05-04) (77 гадоў)
Месца смерці	Гродна, Гродзенская вобласць, Беларусь
Месца пахавання	Гродна
Бацька	Платон Андрэевіч Крэнь
Род дзейнасці	гісторык
Месца працы	Гродзенскі дзяржаўны ўніверсітэт імя Янкі Купалы
Навуковая ступень	кандыдат гістарычных навук
Альма-матар	Гродзенскі педагагічны інстытут імя Янкі Купалы (1959)

Біяграфія

Нарадзіўся ў сялянскай сям’я ў Баранавіцкім раёне.

Скончыў гісторыка-педагагічны факультэт Гродзенскі педагагічны інстытут (1959) па спецыяльнасці «Гісторыя, руская мова і літаратура». У 1959—1967 гадах працаваў настаўнікам. З 1967 года ў Гродзенскім педагагічным інстытуце (з 1978 універсітэце) — старшы выкладчык, дацэнт, з 1990 года загадчык кафедры гісторыі Беларусі, з 1995 года дэкан факультэта гісторыі і культуры.

Скончыў аспірантуру кафедры гісторыі СССР БДУ.

Кандыдат гістарычных навук (1981), абараніў дысертацыю на тэму «Барацьба прафсаюзаў Беларусі за развіццё хімічнай прамысловасці ў рэспубліцы ў 1959—1965 гадах».

Званне прафесара нададзена ў 1991 годзе.

Ганаровы работнік адукацыі Рэспублікі Беларусь (2000).

Ганаровы прафесар Гродзенскага дзяржаўнага ўніверсітэта імя Янкі Купалы (2004).

Кірункі навуковай дзейнасці: дзейнасць грамадскіх арганізацый (прафсаюзаў і інш.), гісторыя населеных пунктаў Гродзеншчыны, гістарычнае краязнаўства. Даследаваў навукова-метадычнае забеспячэнне курсаў гісторыі Беларусі і дапаможных гістарычных дысцыплін.

Аўтар больш за 320 навуковых прац, у тым ліку 5 падручнікаў для студэнтаў па гісторыі Беларусі і Расіі, 2 дапаможнікаў для сярэдніх школ. Аўтар даследчых прац: «Гродна. Гісторыка-эканамічны нарыс» (у суаўтарстве), «Гродна. Энцыклапедычны даведнік» (у суаўтарстве), «Шчучын. Гісторыка-эканамічны нарыс», «Іўе. Гісторыка-эканамічны нарыс», «Нарысы гісторыі Гродзенскай абласной партыйнай арганізацыі», «Гродна ў гады Вялікай Айчыннай вайны. 1941—1945», «Гродзенскі дзяржаўны ўніверсітэт імя Янкі Купалы. Гістарычны нарыс» і іншых.

Памёр 4 мая 2014 года. Пахаваны 6 мая 2014 года ў Гродне.

Літаратура

• Энцыклапедыя гісторыі Беларусі. У 6 т. Т. 5: М — Пуд / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 1999. — 592 с. — 10 000 экз. — ISBN 985-11-0141-9. С. 79.

Спасылкі

• Іван Крэнь: вядомы і невядомы Архівавана 12 мая 2015. — t-styl.info, 12 траўня 2014