Алесь Есакоў

Алесь Есакоў, поўнае імя Аляксандр Аляксандравіч Есакоў (18 снежня 1911, в. Новікава, цяпер Галіцкі раён, Кастрамская вобласць, Расія — 13 чэрвеня 1985, Мінск) — беларускі крытык, тэатразнаўца.

Алесь Есакоў
Дата нараджэння	18 снежня 1911(1911-12-18)
Месца нараджэння	Новікава, Арэхаўскае сельскае паселішча[d], Галіцкі раён, Расія
Дата смерці	13 чэрвеня 1985(1985-06-13) (73 гады)
Месца смерці	Мінск, БССР, СССР
Месца пахавання	Паўночныя могілкі
Грамадзянства	БССР
Род дзейнасці	пісьменнік, крытык, тэатразнавец
Месца працы	Літаратура і мастацтва Беларускі дзяржаўны акадэмічны тэатр юнага гледача Камітэт па справах мастацтваў пры Савеце Міністраў БССР Галоўрэперткам БССР[d] Саюз беларускіх пісьменнікаў Дзяржаўны літаратурны музей Янкі Купалы
Альма-матар	Расійскі інстытут тэатральнага мастацтва[d] (1935)
Член у	Саюз беларускіх пісьменнікаў

Біяграфія

Нарадзіўся ў сям’і рабочага. Пачаў працаваць на Менскай шчотачнай фабрыцы імя Н. К. Крупскай у 1928 г. Быў артыстам і загадчыкам літаратурнай часткі Тэатра рабочай моладзі. Вучыўся на рабфаку, у 1932—1935 гадах у Дзяржаўным інстытуце тэатральнага мастацтва імя А. В. Луначарскага. У 1935—1936 гадах служыў у Чырвонай Арміі.

З 1936 г. загадчык аддзела мастацтва ў газеце «Літаратура і мастацтва», з 1938 г. дырэктар Рэспубліканскага тэатра юнага гледача, з 1940 г. начальнік аддзела тэатраў Упраўлення па справах мастацтва пры СНК БССР.

Удзельнічаў як ваенны журналіст у паходзе Савецкай Арміі ў Заходнюю Беларусь і ў савецка-фінляндскай вайне. Пасля нападу Германіі на СССР у час Другой сусветнай вайны знаходзіўся ў дзеючай арміі, потым у партызанскім атрадзе на Міншчыне. Быў паранены.

Пасля вайны ў 1944—1945 гадах працаваў начальнікам Галоўрэперткама БССР, загадчыкам аддзела ў газеце «Літаратура і мастацтва» (1945—1951), літаратурным кансультантам у СП БССР (1951—1960). У 1960—1974 гг. вучоны сакратар Літаратурнага музея Янкі Купалы.

Сябра Саюза пісьменнікаў Беларусі з 1947 года.

Пахаваны на Паўночных могілках Мінска.

Узнагароды

Узнагароджаны медалямі.

Творчасць

Літаратурную дзейнасць пачаў у 1928 г. Аўтар кнігі «Зерне да зерня: Абразкі з жыцця Янкі Купалы» (Мінск, 1977), манаграфічнага нарыса «Уладзімір Крыловіч: жыццёвы і творчы шлях» (Мінск, 1956), нарысаў «Калгасны хор сяла Азершчына» (з Б. Смольскім, Мінск, 1953) і «Старэйшы самадзейны калектыў» (Мінск, 1958), манаграфіі «Янка Купала і беларускі тэатр» (Мінск, 1972), брашуры «Янка Купала і беларускае мастацтва» (Мінск, 1972), адзін з аўтараў п’есы «Першы штандар» (1930, пастаўлена ў 1929).

Дакументы з асабістага архіва захоўваюцца ў Беларускім дзяржаўным архіве-музеі літаратуры і мастацтва (фонд 313).

Спасылкі

• Алесь Есакоў на сайце анлайн-энцыклапедыі «Беларусь у асобах і падзеях»