Беларускі менталітэт
Беларускі менталітэт – своеасаблівы тып мыслення, які прыпісваецца беларусам. Адлюстроўвае ўяўленні аб свеце ў цэлым, аб прыродным і сацыяльным асяроддзі, аб саміх сабе і прадстаўнікоў іншых груп[1]. Уключае ўсвядомленыя і неўсвядомленыя ўяўленні, устаноўкі і стэрэатыпы, сацыяльныя паводзіны[2].
Гісторыя развіцця і фарміравання
правіцьГлыбінныя вытокі беларускага менталітэту і яго асноватворныя рысы пачалі фарміравацца яшчэ ў старажытнасці. Да прыняцця хрысціянства жыхары тэрыторыі сучаснай Беларусі прытрымваліся паганскіх вераванняў, пакланяліся розным багам, аддавалі ўшанаванні прыродным стыхіям, нябесным свяцілам, а таксама святым дрэвам, камяням, пагоркам. Ментальнасць насельніцтва той эпохі вызначалася абагаўленнем зямлі, адухаўленнем усёй прыроды (пантэізм), перакананасцю ў рэальнае існаванне душы, злых і добрых духаў (анімізм), вербальнай магіі (вера ў цудатворную сілу асаблівых слоў і выразаў), адчуванне непарыўнага адзінства паміж чалавекам і навакольнай прасторай[3][1].
Нават пасля прыходу хрысціянства ментальнасць шмат у чым заставалася паганскай. Гэта было абумоўлена, перш за ўсё, тым, што новая вера распаўсюджвалася павольна. Як пісала культуролаг Таццяна Баярчук, на доўгае захаванне рэшткаў паганства ў немалой ступені аказала ўплыў і тое, што большасць насельніцтва да XX стагоддзя былі сялянамі. Усё ж у светаразуменні насельніцтва адбыліся змены, выкліканыя спляценнем старой і новай вер. Паступова ўкараніўся монатэізм і хрысціянскі гуманізм[4].
У эпоху фарміравання Вялікага Княства Літоўскага ў насельніцтва выяўляецца імкненне да дзяржаўна-палітычнага адзінства. У гэты перыяд этнічная самаідэнтыфікацыя выяўлялася этнонімамі «русіны», звязаным з часамі Кіеўскай Русі і пазначаўшым праваслаўнае насельніцтва, і «ліцвіны», пад якім разумеліся ўсе жыхары дзяржавы незалежна ад канфесіі і этнічнага паходжання. У эпоху Вялікага Княства Літоўскага развівалася мова, пісьменнасць, філасофская думка, ствараліся дакументы, якія характарызуюць высокі ўзровень палітычнай і прававой ментальнасці. У насельніцтва ўзнікае ўяўленне аб Вялікай (маецца на ўвазе Княства) і Малой (лакальная тэрыторыя пражывання) радзіме. Складваецца этнічная тэрыторыя будучага беларускага народа. Лічыцца, што менавіта тады насельніцтва сучаснай Беларусі стала ўяўляць сабой адзіную народнасць[5].
Перыяд уваходжання беларускіх зямель у склад Рэчы Паспалітай адзначыўся палітыкай паланізацыі і акаталічвання, грамадскай дэзінтэграцыяй. У дадзеную эпоху этнічная самасвядомасць насельніцтва была прадстаўлена наступнымі кампанентамі: тэрыторыяй пражывання, якая мела назву «Белая Русь»; этнонім «беларусцы», дапаўняльным іншым, больш старажытным этнонімам «ліцвіны»; уніяцкай царквой, якая аб’яднала да канца XVIII стагоддзя каля 80% жыхароў. З уключэннем у склад Расійскай імперыі польскі ўплыў замяняецца рускім, пачалася русіфікацыя. Аднак быў запушчаны працэс нацыянальнай мадэрнізацыі. У літаратуры актывізавалася ўжыванне беларускай мовы, якая да гэтага захоўваўся толькі ў вуснай форме[6]. Менавіта пры расійскай уладзе за насельніцтвам краю канчаткова замацаваўся этнонім «беларусы»[7].
Пры савецкай уладзе ў 1920-х гадах праводзілася палітыка беларусізацыі. Яна спрыяла шырокаму развіццю нацыянальнай культуры, што выяўлялася ў стварэнні школ, тэхнікумаў, ВНУ на беларускай мове навучання, дзейнасці культурна-асветных устаноў, развіцці беларускай літаратуры, публікацыі на беларускай мове кніг, газет, часопісаў і г.д.; а таксама ў вылучэнні беларусаў на партыйную, савецкую і прафсаюзную працу. У гэты час запушчаны працэс нацыянальнага адраджэння, выявілася імкненне асобных прадстаўнікоў беларускага этнасу заявіць пра беларусаў як самастойную, унікальную, самабытную нацыі, здольную стварыць уласную дзяржаўнасць[8].
Карэнныя змены ў нацыянальнай самасвядомасці беларусаў адбыліся ў другой палове 80-х гадоў, калі ў Савецкім Саюзе была пачата «перабудова». У грамадстве наспеў запыт на пераадоленне адставання нацыянальна-культурнага развіцця карэннага этнасу і адраджэння мовы і культуры[9].
Культуралагічная характарыстыка
правіцьБаярчук сярод ключавых традыцыйных рыс беларусаў вылучыла гуманнасць, талерантнасць і памяркоўнасць. Пад талерантнасцю (сацыёлаг Віктар Кірыенка лічыў яе вызначальнай рысай[10]) разумеецца цярпімасць у адносінах да іншых, не сваіх поглядаў, пазіцый, узораў культуры, «глыбіннае дасягненне магчымасці і нават неабходнасці дружалюбнага суіснавання» з прадстаўнікамі іншых груп. Дадзеная рыса мае канкрэтныя гістарычныя карані, так як беларусы доўгі час жылі ў складзе шматнацыянальных і шматканфесійных дзяржаў. Вылучаюць таксама цярплівасць, цягавітасць і неагрэсіўнасць (у той жа час гэта можа тлумачыцца як пакорлівасць і абыякавасць[10]). Аднак, у пэўных сітуацыях, як лічыла культуролаг, спасылаючыся на вопыт Вялікай Айчыннай вайны, яны здольныя да праявы адвагі і рашучасці. Акрамя таго, яна дадала яшчэ працавітасць, разважлівасць, стрыманасць, сціпласць, высокі ўзровень адукаванасці, шырокі культурны кругагляд[9]. Кірыенка пісаў, што ментальны аўтапартрэт сучасных беларусаў вызначаецца ў першую чаргу сацыяльна-духоўнымі і патрыярхальна-традыцыйнымі, калектывісцкімі характарыстыкамі, у меншай ступені — рацыянальна-дзейнымі, індывідуалістычнымі ментальнымі[10].
Асаблівую спецыфіку менталітэту надало культурнае памежжа паміж Захадам і Усходам. Дадзеная акалічнасць прадставіла спрыяльныя магчымасці для самастойнасці нацыі. У той жа час яна ставіць перад неабходнасцю ажыццяўляць выбар паміж Захадам і Усходам і пастаянна шукаць свой уласны шлях развіцця[11][12]. На думку Кірыенкі, менталітэт беларусаў з’яўляецца роднасным як усходнеславянскім — рускаму і ўкраінскаму, так і заходнеславянскаму польскаму, але разам з тым з’яўляецца самастойным, валодае ўласнай самабытнай культурай. Гэтым тлумачыцца і шматвектарнасць знешняй палітыкі Беларусі[10].
На думку Баярчук, беларусам уласцівая прыхільнасць да сваёй зямлі-карміцелькі, роднага краю, імкненне прыстасаваць працу і адпачынак да пэўных прыродна-сезонных цыклаў (т. зв. «каляндарны тып менталітэту»). Даследчыца спаслалася на народны каляндар, багаты святамі, і адпаведныя песні, танцы, абрады, прыкметы і павер’і[13].
Расійскі культуролаг Эмір Тужба пісаў, што знаходжанне пад уплывам савецкай культуры з уласцівымі ёй рысамі (калектывізм; эгалітарызм; аскетызм; адмаўленне матэрыяльных каштоўнасцяў і выгод; інтэрнацыяналізм; ахвярнасць) адказвала ментальным каштоўнасцям беларусаў. Асаблівае значэнне набыла роля лідара (у савецкі перыяд — Пятра Машэрава, у постсавецкі — Аляксандра Лукашэнкі)[14].
Велізарны ўплыў таксама аказалі натуральныя фактары: клімат, рэльеф, флора і фауна. Суровыя ўмовы надвор’я, такія як працяглыя і халодныя зімы, кароткае лета, багацце ападкаў, моцныя вятры і агульная неабароненасць людзей, выклікалі ў насельніцтва страх і пакланенне перад сіламі прыроды. Неспрыяльны клімат прымушаў жыхароў аб’ядноўвацца для сумеснага вядзення гаспадаркі і абароны. Багацце рэк, балот, нізін, спадзістых раўнін спрыяла з’яўленню сузіральнага ўспрымання жыцця. З рэльефам мясцовасці Баярчук звязвала такія нацыянальныя рысы, як мяккасардэчнасць, талерантнасць, дабрыня, адсутнасць схільнасці да прыняцця хуткіх, вокамгненных рашэнняў[13]. Са слоў Кірыенкі, гэта вылілася ў грунтоўнасці, ашчаднасці, асцярожнасці і канкрэтнасці мыслення; эмацыйнай патрэбе ў калектыўным ажыццяўленні працы і адмаўленні індывідуалістычных настрояў; у дамінаванні ў працоўным паводзінах фактару абставінаў, чым рацыяналізму і практыцызму; у перавазе падазронага стаўлення да багацця[10].
На сённяшні дзень вядуцца спрэчкі вакол таго, ці ўдзельнічалі ўсе пласты насельніцтва ў фарміраванні беларускай самасвядомасці, альбо ж нацыянальная ментальнасць сфармавалася выключна ў сялянскім асяроддзі[15].
Сацыялогія і псіхалогія
правіцьПаводле апытання Інстытута сацыялогіі НАН Беларусі, праведзенага ў ліпені 2017 года сярод 2094 чалавек, грамадзяне Беларусі ў большай ступені прыпісалі сабе такія якасці, як працавітасць, прыязнасць, сціпласць, спагадлівасць, талерантнасць, шчырасць. У меншай ступені выказана меркаванне аб уласцівасці беларусам такіх рыс, як прагрэсіўнасць, прадпрымальнасць, крэатыўнасць, ініцыятыўнасць[16].
Даныя даследавання Сяргея Шавеля і Людмілы Галіч паказалі, што грамадская думка Беларусі адрозніваецца большай напружанасцю і экспрэсіўнасцю. Дадзеная акалічнасць прыводзіць да перабольшання рызык і небяспекі некаторых праблем. На думку даследчыкаў, невялікія маштабы і колькасць насельніцтва краіны павышаюць шчыльнасць сувязі, сацыяльна-псіхалагічную эмпатыю, а разам з тым і ўспрыманне верагоднасці ператварэння абстрактнай магчымасці ў рэальную[17].
Паводле даследавання псіхолагаў Марыі Адзінцовай і Алены Сямёнавай, беларусы схільныя ў стрэсавых сітуацыях звяртацца да копінга стрэсавай паводніцкай стратэгіі пазбягання, адцягваючыся ад праблем. Яны мала замыкаюцца на сваім болі і не так востра адчуваюць псіхалагічнае напружанне. Эмацыйнае рэагаванне на стрэсы ў беларускіх жанчын нашмат вышэй, чым у беларускіх мужчын. Жанчыны адрозніваюцца нізкай адаптыўнасцю і нізкай настойлівасцю[18].
Крыніцы
правіць- ↑ а б Курбиева 2011, с. 276.
- ↑ Зуева 2021, с. 186—187.
- ↑ Боярчук 2012, с. 280—281.
- ↑ Боярчук 2012, с. 281—282.
- ↑ Боярчук 2012, с. 282—283.
- ↑ Боярчук 2012, с. 283—285.
- ↑ Балич и Харитонов 2018, с. 136.
- ↑ Боярчук 2012, с. 285.
- ↑ а б Боярчук 2012, с. 287.
- ↑ а б в г д Тужба 2016, с. 350.
- ↑ Боярчук 2012, с. 288.
- ↑ Тужба 2016, с. 349.
- ↑ а б Боярчук 2012, с. 281.
- ↑ Тужба 2016, с. 351.
- ↑ Зуева 2021, с. 187.
- ↑ Балич и Харитонов 2018, с. 148.
- ↑ Тужба 2016, с. 352.
- ↑ Тужба 2016, с. 353.
Літаратура
правіць- Курбиева, И. Ю. Белорусский менталитет и его развитие / И. Ю. Курбиева // Беларусь в современном мире : материалы IV Республик. науч. конф. студентов, магистрантов и аспирантов, Гомель, 12 мая 2011 г. / М-во образования Респ. Беларусь, Гомел. гос. техн. ун-т им. П. О. Сухого ; под общ. ред. В. В. Кириенко. – Гомель : ГГТУ им. П. О. Сухого, 2011. – С. 276 - 278.
- Боярчук, Т. Н. Влияние исторического прошлого на менталитет белорусов // Історичні і політологічні дослідження. – 2012. – № 1. – С. 280-291.
- Тужба Э. Н. Факторы формирования отношений и повседневности русских и белорусов // Russian Journal of Education and Psychology. — 2016. — № 11(67). — С. 345—362.
- Балич Н.Л., Харитонов И.Н. Этническое самосознание и практики национальных общностей Беларуси // Социологический альманах. — 2018. — № 9. — С. 132—149.
- Зуева, Н. М. Выяўленне нацыянальнага менталітэту беларусаў у апавяданні Лукаша Калюгі «Шкодны вісельнік» // Беларуская мова, лiтаратура, культура i свет: праблемы рэпрэзентацыi: зб. навук. арт. па вынiках Мiжнар. навук. канф., Мiнск, 15-16 лiстап. 2018 г. – Мiнск: МДЛУ, 2021. – C. 186-193.