Жэмчуг

Жэмчуг, таксама Перл — цвёрдыя вапняковыя ўтварэнні перламутравага рэчыва шарападобнай або няправільнай формы, якія развіваюцца ўнутры ракавін некаторых малюскаў (марскіх і прэснаводных).

Жэмчуг
Жэмчуг з горада Тоба, Японія
Формула	Араганіт і канхіялін
Колер	Белы, жаўтаваты, серабрысты, залацісты, крэмавы, галубай, зялёны, чорны, шэры, ружовы
Колер рысы	Белы
Бляск	Перламутравы
Празрыстасць	Які прасвечвае да непразрыстага
Цвёрдасць	3-4
Спайнасць	Адсутнічае
Злом	шкарлупісты
Шчыльнасць	2,60 - 2,78 г/см³
Паказчык пераламлення	1,52 - 1,66, у чорнага - 1,53 - 1,69

Назва

Слова жэмчуг кітайскага паходжання.

Апісанне

Памерам ад дробных зярнят да галубінага яйца. Можа класіфікавацца як мінерал класа арганічных злучэнняў. Складзены пераважна з вуглякіслага кальцыю (арганіту). Колер белы, ружовы, жаўтаваты, іншы раз чорны, шэры, карычневы. Бляск характэрны перламутравы, вясёлкавы.

Пашырэнне

Утвараецца ў выніку раздражнення мантыі малюска якім-небудзь чужародным прадметам (пясчынкай, паразітам і інш.).

Здабываецца ў Чырвоным моры і Персідскім заліве, каля берагоў Шры-Ланкі, Японіі, Аўстраліі, Венесуэлы. Прэснаводны жэмчуг з даўніх часоў здабываўся ў Расіі, Шатландыі, Германіі, Кітаі, у краінах Паўночнай Амерыкі. Вырошчваецца штучна.

Выкарыстанне

Шануецца як каштоўны камень. Выкарыстоўваецца для вытворчасці ювелірных упрыгожванняў (каралі, брошкі, пярсцёнкі, жамчужнае шыццё), нярэдка ў спалучэнні з каштоўнымі металамі і камянямі.

Літаратура

• Геаграфічныя паняцці і тэрміны. — Мн.: БелЭн, 1993. ISBN 5-85700-085-8
• Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).

Спасылкі

• На Вікісховішчы ёсць медыяфайлы па тэме Жэмчуг
• Працэс росту жамчужыны на YouTube (англ.)