Канстанцінаўская града

Канстанцінаўская града — форма рэльефу на захадзе Мядзельскага раёна Мінскай вобласці, выдзяляецца ў складзе фізіка-геаграфічнага раёна Нарачана-Вілейская нізіна. Цягнецца з паўночнага захаду на паўднёвы ўсход уздоўж паўднёва-ўсходняга берага возера Свір. Вышыня 190—200 м, найбольшая 232 м.

Канстанцінаўская града
Каардынаты: 54°55′ пн. ш. 26°28′ у. д.
Размяшчэнне	Беларусь
Канстанцінаўская града

Магутнасць асадкавага чахла каля 380 м. Пашыраны адклады сярэдняга дэвону (мергелі, даламіты з праслоямі глін, пясчанікаў), чацвярцічныя валунныя супескі і суглінкі, пясчана-галечны матэрыял, участкі маламагутнага покрыва з водна-ледавіковых супескаў. Фарміраванне грады звязана з краявой зонай акумуляцыі паазерскага зледзянення.

Рэльеф грады сярэдне- і буйнаўзгорысты з ваганнямі адносных вышынь 15—20 м, радзей 25—30 м. Канстанцінаўская града — сістэма ўзгоркаў акруглай формы з выпуклымі, часам плоскімі вяршынямі. Грэбень грады ўзгорыста-хвалісты, парэзаны седлавінамі. Схілы асіметрычныя: паўднёва-заходні стромкі (10—30°), паўночна-ўсходні спадзісты, паступова пераходзіць у водна-ледавіковую раўніну. Трапляюцца камавыя ўзгоркі (вышыня 5—15 м), складзеныя з тонкаслаістых пяскоў з уключэннем жвіру і галькі, а таксама замкнёныя сподкападобыыя западзіны тэрмакарставага паходжання. У двух месцах града парэзана далінамі прарыву рэк Страча і Вялікі Перакоп.

Глебы дзярнова-падзолістыя сярэдне- і слабаападзоленыя, месцамі слабаэрадзіраваныя супясчана-сугліністыя. Лясы яловыя, радзей хваёвыя кусцікава-зеленамошныя і зеленамошна-чарнічныя. Пад ворывам да 40 % тэрыторыі.

Літаратура

• Харанічава Г. Т. Канстанцінаўская града // Беларуская энцыклапедыя: У 18 т. Т. 3: Беларусы — Варанец / Рэдкал.: Г. П. Пашкоў і інш. — Мн. : БелЭн, 1996. — Т. 3. — 511 с. — 10 000 экз. — ISBN 985-11-0035-8. — ISBN 985-11-0068-4 (т. 3).