Капліца (Чамброва)

Капліца — каталіцкая капліца былой сядзібы ў Чамброве, размешчаная на могілках за 1,3 км на поўнач ад Валеўкі, справа ад дарогі Р5 «Баранавічы — Навагрудак — Іўе».

Славутасць
Капліца
53°28′30″ пн. ш. 25°52′34″ у. д.
Краіна	Беларусь
Месцазнаходжанне	Чамброва[d]
Архітэктурны стыль	класіцызм
Дата пабудовы	1896
Статус	Гісторыка-культурная каштоўнасць Беларусі, шыфр 413Г000771

Гісторыя

Капліца ў 1914 годзе. Ян Булгак

Капліца ў 1925 годзе. Ян Булгак

Пабудавана ў 1896 годзе з цэглы як надмагілле ўладальніка маёнтка Чамброва Карповіча.

Капліца, якая доўга стаяла разбуранай, была адноўлена па ініцыятыве Генеральнага консула Рэспублікі Польшча ў Гродне Ярослаў Ксёнжак пры фінансавай падтрымцы Польскага нацыянальнага фонду. Стварыць праект з гістарычнай дакладнасцю дапамаглі архіўныя матэрыялы і працы фатографа Яна Булгака. Была адноўлена фігура Хрыста, які нясе крыж, ад якой заставалася толькі частка тулава, праведзена добраўпарадкаванне тэрыторыі, выкладзена дарожка і ўстаноўлены лаўкі.

24 верасня 2019 года адноўленая капліца была ўрачыста асвечана біскупам гродзенскім Аляксандрам Кашкевічам. На цырымоніі прысутнічалі нашчадкі звязаных з гэтым месцам родаў Карповічаў і Булгакаў, польскія дыпламаты з Гродна і Мінска, улады Польскага нацыянальнага фонду, прадстаўнікі польскага МЗС, маршалкоўскай управы Падляскага ваяводства і кіраўніцтва Навагрудскага раёна.

Капліца ўключана ў турыстычны маршурт «Шляхам Адама Міцкевіча».

23 лістапада 2021 рашэннем Гродзенскага абласнога савета па пытаннях гісторыка-культурнай спадчыны капліцы прысвоены статус гісторыка-культурнай каштоўнасці 3-й катэгорыі.

Архітэктура

Помнік архітэктуры позняга класіцызму. Вырашана ўзнятай на кубападобны пастамент 4-граннай вежай пад сферычным купалам. Другі ярус адкрыты арачнымі прасветамі і прызначаўся для сакральнай скульптуры; апяразаны карнізам з сухарыкамі, крапаваны па вуглах 3-чацвяртнымі калонамі.

Спасылкі

• Капліца (Чамброва) на сайце Глобус Беларусі (руск.)