Лістапад (кінафестываль)

Мінскі міжнародны кінафестываль «Лістапад» — штогадовы міжнародны кінафестываль, які праходзіць у Мінску ў лістападзе паводле пастановы Савета Міністраў Рэспублікі Беларусь.

Кінафестываль «Лістапад»
Агульныя звесткі
Дата	1994 — наш час
Месца	Беларусь, Мінск
Афіцыйны сайт фестывалю

Заснавальнікі і арганізатары

• Міністэрства культуры Рэспублікі Беларусь
• Мінскі гарадскі выканаўчы камітэт
• Беларускі саюз кінематаграфістаў
• Нацыянальная кінастудыя «Беларусьфільм»
• Нацыянальная дзяржаўная тэлерадыёкампанія Рэспублікі Беларусь
• РУП «Беларускі відэацэнтр»

Пры садзейніцтве:

• Міністэрства замежных спраў Рэспублікі Беларусь
• Парламенцкага Сходу Саюза Беларусі і Расіі
• Пастаяннага камітэта Саюзнай дзяржавы

Мэты

• падтрымка ігравога кіно, фармаванне яго высокага сацыяльна-культурнага статусу;
• захаванне адзінай кінематаграфічнае прасторы Расіі, краін СНД і Балтыі, далёкага замежжа;
• развіццё творчых кантактаў, абмен досведам і ідэямі паміж кінематаграфістамі Рэспублікі Беларусь і замежных краін;
• аказанне дапамогі творчай моладзі ў сферы кінематаграфіі;
• прадстаўленне беларускім кінагледачам найлепшых кінастужак вытворчасці апошніх двух гадоў, адзначаных на міжнародных кінафестывалях;
• умацаванне культурных сувязяў паміж Рэспублікаю Беларусь і замежнымі краінамі, а таксама творчых дачыненняў між кінематаграфістамі краін-удзельніц кінафоруму;
• папулярызацыя дасягненняў нацыянальных кінематаграфій.

Гісторыя

Першапачаткова «Лістапад» прадугледжваўся як кінафорум краін СНД і Балтыі. Зазвычай адбіраліся, стужкі, якія з пэўных прычын не траплялі ў шырокі пракат, але адлюстроўвалі культуру той ці іншай краіны. Менавіта ў такой якасці фестываль упершыню паўстаў у лістападзе 1994 года. З цягам часу кінафестываль пашыраўся, заваёўваў аўтарытэт, і ў 2003-м годзе афіцыйна набыў статус міжнароднага. Тады ў Мінск прывезлі карціны з Расіі, Польшчы, ЗША, Ірана, Сербіі, Балгарыі, Чэхіі, Кітая, Японіі.

Лістапад 2010

У 2010 фестываль паўстаў перад гледачамі ў абноўленым фармаце. Яго праграму склалі:

• асноўны конкурс ігравога кіно (12 фільмаў),
• конкурс маладога кіно (9 дэбютных фільмаў рэжысёраў з усяго свету, у тым ліку ўпершыню — з Індыі, Перу, Венесуэлы, Іспаніі, Уругвая),
• конкурсны паказ неігравых фільмаў (20 карцін)
• конкурс маладога неігравога кіно (12 карцін).

У асноўным конкурсе ігравога кіно была прадстаўлена кінастужка беларускага рэжысёра Андрэя Кудзіненкі «Масакра».

Адметнай асаблівасцю XVII ММКФ «Лістапад» з’яўлялася тое, што яго пераможца вызначыла прафесійнае журы, а не гледачы, як гэта было ў папярэднія гады. Арганізатары фестывалю аргументавалі гэта новаўвядзенне тым, што гледачы не могуць паглядзець усе конкурсныя фільмы, у лепшым выпадку яны пазнаёмяцца з 30 % кінастужак, а гэта ўжо неаб’ектыўна. Прафесійнае журы, перш чым прыняць рашэнне, у абавязковым парадку адгледжвае ўсе кінастужкі.

Дырэкцыя кінафестывалю

• Генадзь Давыдзька — старшыня фестывалю
• Анжаліка Крашэўская — дырэктар фестывалю
• Ірына Дзям’янава — дырэктар праграмы дакументальнага кіно
• Ігар Сукманаў — дырэктар праграмы ігравога кіно
• Ксенія Даніна — праграмны дырэктар фестывалю дзіцячага і юнацкага кіно «Лістападзік»

Пераможцы

2010

• «Прагульшчыкі» Ляван Кагуашвілі (Грузія) — найлепшая мастацкая стужка
• «Днюка» Андрэй Куціла і Аляксандр Налівайка (Беларусь-Польшча) — найлепшая дакументальная карціна паводле меркавання кінакрытыкаў і кінаведаў
• «Днюка» Андрэй Куціла і Аляксандр Налівайка (Беларусь-Польшча) — спецпрэмія Беларускага саюза кінематаграфістаў
• «Выкрадальнік святла» Актан Арым Кубат (Кыргызстан) — адмысловы прыз выканаўчага камітэта СНД «Кіно без меж»
• «Прыстанак» Раланд Барашвілі (Грузія) — асобны прыз МДТРК «Мір» «Мова кіно — мова паразумення»
• «У выпадку разгерметызацыі» Сара Мун Хау (Бельгія) — спецпрэмія ад Беларускага саюза кінематаграфістаў
• «Заварвай чай» Вольга Кароткая (Расія-Вялікабрытанія) — спецпрэмія ад Беларускага саюза кінематаграфістаў
• «Брат» Марсель Раскіна (Венесуэла). Спецыяльны прыз ад «Белтэлекама» атрымала мастацкая стужка

Спасылкі

• На Вікісховішчы ёсць медыяфайлы па тэме Лістапад (кінафестываль)
• listapad.com — афіцыйны сайт кінафестывалю «Лістапад»
• «Лістапад» Архівавана 2 жніўня 2018. на Афіцыйным сайце Рэспублікі Беларусь