Мабільныя сілы Беларусі

Мабільныя сілы Беларусі — род войскаў ва Узброеных сілах Рэспублікі Беларусь, які існаваў у 1995—2007 гадах. Прызначаўся для прыкрыцця стратэгічнага разгортвання, зрыву спецыяльных аперацый праціўніка і выканання іншых раптоўных задач.

Мабільныя сілы Беларусі
Гады існавання	1995—2007
Краіна	Беларусь
Падпарадкаванне	Генеральны штаб Узброеных Сіл Рэспублікі Беларусь
Уваходзіць у	Сухапутныя войскі Рэспублікі Беларусь
Тып	род войскаў
Дэвіз	Раптоўнасць, сіла, шпаркасць

Узнікненне

У 1992 годзе была прынятая першая ваенная дактрына незалежнай Беларусі. Дакумент вызначаў ваенную палітыку краіны як выключна абарончую. У гэтай сувязі пачаўся перагляд функцый і задач паветрана-дэсантных войскаў. У Рэспубліцы Беларусь пасля распаду СССР такіх падраздзяленняў існавала тры: 103-я гвардзейская паветрана-дэсантная дывізія (Віцебск), 38-я асобная гвардзейская дэсантна-штурмавая брыгада (Брэст).

У чэрвені 1995 года прэзідэнт Аляксандр Лукашэнка выдаў указ аб стварэнні мабільных сіл. У верасні падраздзяленні ПДВ зарабілі ў новым фармаце.

Склад і арганізацыя

У верасні 1995 года на базах 103-й дывізіі і 38-й брыгады створаны 38-й, 317-й і 350-й асобныя гвардзейскія мабільныя брыгады, а таксама 357-ы асобны гвардзейскі навучальны батальён. У 2002 годзе 317-я, 350-я брыгады і 357-ы батальёна аб’яднаныя ў 103-ю брыгаду, чые асобныя батальёны атрымалі нумары 317, 350 і 357.

На базе падраздзялення сфармаваны 33-ы асобны атрад спецназа, які атрымаў сакрэтнае Найменне «СДА» (спецыяльны дыверсійны атрад). У 2005-м там жа ўтворана міратворчая рота.

Мабільныя часткі ўваходзілі ў склад сухапутных войскаў. Агульнае кіраўніцтва падраздзяленняў ажыццяўляла ўпраўленне мабільных сіл.

У пачатку 2000-х гг. мабільныя брыгады былі перападпарадкаваны Генеральнаму штабу, а ў складзе аператыўнага ўпраўлення створаны аддзел сіл спецыяльных аперацый, што павысіла ўзровень арганізаванага кіравання мабільнымі часткамі і падраздзяленнямі спецпрызначэння. У 2004-м аддзел рэарганізаваны да ўпраўлення.

Функцыянал

Пры стварэнні мабільных войскаў меркавалася, што задачы ў іх будуць агульнавайсковымі. На вучэннях падраздзяленням даручалі весці як наступальныя, так і абарончыя дзеянні, а таксама прыкрыццё асобных кірункаў. Мабільнасць, што з’яўлялася галоўнай іх перавагай, камандаванне фактычна не выкарыстоўвала. Аднак пазней злучэнні мабільных сіл сталі адпрацоўваць асобныя задачы спецыяльных дзеянняў, звязаныя, у асноўным, з процідзеяннем незаконным узброеным фарміраванням і дэсантна-дыверсійным сілам праціўніка.

Рэарганізацыя

2 жніўня 103-я і 38-я брыгады мабільных войскаў былі аб’яднаны з 5-й асобнай брыгадай спецыяльнага прызначэння ГРУ у новы род войскаў — сілы спецыяльных аперацый.