Планета (гасцініца, Мінск)
Планета — гасцініца ў Мінску, размешачаная па праспекце Пераможцаў, 31. Пабудавана ў 1980 годзе па праекце архітэктараў Г. Бенядзіктава, У. Начарава, Т. Раманоўскай са зборнага жалезабетону.
| Планета | |
|---|---|
 | |
| Краіна | |
| Месцазнаходжанне | |
| Канец будаўніцтва | 1980 |
| Архітэктар | Георгій Міхайлавіч Бенядзіктаў, Уладзімір Іванавіч Начараў і Тамара Герасімаўна Раманоўская |
 Медыяфайлы на Вікісховішчы | |
Архітэктура правіць
Дынамічная аб’ёмна-прасторавая кампазіцыя складаецца з дванаццаціпавярховага жылога корпуса (на 601 месца) і двухпавярховага аб’ёма рэстарана.
Архітэктура жылога корпуса заснавана на рытме гарызантальных міжпаверхавых керамзітабетонных панелей і вертыкальных навясных рэбраў. Сцены звонку аздоблены вертыкальнымі цягамі з алюмінію. Элемент асіметрыі ў кампазіцыю ўносіць самастойны вертыкальны аб’ём пажарнай лесвічнай клеткі, у завяршэнні якой светлавая рэклама.
Планіроўка калідорная з двухбаковым размяшчэннем пакояў. Перад ліфтавымі групамі і міжпаверхавай лесвіцай прасторныя холы. На 4-м і 2-м паверхах адміністрацыйныя і службовыя памяшканні, кіёскі. У афармленні інтэр’ераў выкарыстаны ракушачны туф, чорны лабрадарыт, шэры мармур, шпона, ціснёная скура.
Прамавугольны ў плане аб’ём рэстарана значна выступае перад галоўным фасадам гасцініцы і арганізаваны вакол унутранага дворыка. Фасады абліцаваны туфам. На галоўным фасадзе асіметрычна размешчана дэкаратыўнае пано (мастак Я. Кузняцоў, размалёўка па керамічнай плітцы). На 1-м паверсе знаходзіцца вестыбюль, гардэроб рэстарана, экспрэс-кафэ, на 2-м — абедзенная зала і бар. Паверхі звязаны вітой лесвіцай. Кесонная столь залы аздоблена сюжэтнай арнаментальнай фрэскавай размалёўкай (мастачка С. Каткова), сцены аформлены дэкаратыўнымі керамічнымі пано (мастакі М. Байрачны, В. Прыешкін і інш.). Дэкаратыўны акцэнт інтэр’ера — вялізная люстра (нёманскае шкло). Пры ўваходзе ў рэстаран керамічнае пано «Садоўніца».
2 снежня 2021 года гасцініца ўвайшла ў чорны спіс Еўрасаюза[1]. 20 снежня «Планету» ў свой санкцыйны спіс уключыла Швейцарыя[2]. 22 снежня да адпаведнага пакета санкцый ЕС далучыліся Албанія, Ісландыя, Ліхтэнштэйн, Нарвегія, Паўночная Македонія, Сербія, Чарнагорыя[3][4].
Зноскі
- ↑ ЕС прыняў пяты пакет санкцый супраць Беларусі ў сувязі з міграцыйным крызісам. Наша Ніва (2 снежня 2021). Праверана 23 снежня 2021.
- ↑ Searching for subjects of sanctions
- ↑ Яшчэ некалькі еўрапейскіх краін далучыліся да пятага санкцыйнага пакета Еўразвязу, у тым ліку прарасійская Сербія. Наша Ніва (23 снежня 2021). Праверана 23 снежня 2021.
- ↑ Declaration by the High Representative on behalf of the European Union on the alignment of certain countries concerning restrictive measures in view of the situation in Belarus (англ.). Савет Еўрапейскага саюза (22 снежня 2021). Праверана 23 снежня 2021.
Літаратура правіць
- 233ж. Гасцініца «Планета» // Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1988. — Мінск. — 333 с.: іл. — ISBN 5-85700-006-8.