Хроніка прынцаў

«Хроніка прынцаў», больш вядомая пад валійскай назвай Brut y Tywysogion — адна з найважнейшых крыніц па гісторыі Уэльса. Гэта хроніка ў форме аналаў, складзеная як працяг «Гісторыі каралёў Брытаніі» Гальфрыда Монмуцкага. «Хроніка прынцаў» захавалася ў выглядзе некалькіх валійскіх перакладаў лацінскага арыгінала, які не дайшоў да нашых дзён. Самыя важныя рэдакцыі захаваліся ў рукапісы Peniarth 20 і ў Чырвонай Кнізе з Хергеста (трохі меншы за поўны варыянт). Версія, вядомая як Brenhinedd y Saeson («Каралі англічан»), спалучае матэрыял валійскіх аналаў і англійскіх крыніц.

Версія Peniarth MS пачынаецца на 681 годзе з запісу пра смерць Кадваладра ап Кадвалана і заканчваецца 1332 годам. Запісы пад кожным годам звычайна кароткія і згадваюць толькі самыя важныя падзеі, такія як нечыя смерці і стыхійныя бедствы, але ў пазнейшы час становяцца больш падрабязнымі. Асаблівая ўвага надаецца каралеўствам Гвінед, Дэхейбарт і Повіс, але згадваюцца таксама царкоўныя падзеі, такія як пераход пры разліку даты Вялікдня з кельцкага календара на рымскі, здзейснены ў 768 годзе Эльбодыем (Элвадам), епіскапам Бангарскім. Часам сустракаюцца кароткія запісы пра падзеі ў Англіі, Шатландыі, Ірландыі і Францыі.

Мяркуецца, што першапачатковая версія «Хронікі прынцаў» была складзена ў абацтве Страта Фларыда, але магла ў XI стагоддзі захоўвацца ў манастыры Ланбадарна. Пры складанні «Хронікі» выкарыстоўваліся і аналы іншых манастыроў. Прынамсі адна валійская версія таксама, верагодна, была складзена ў Страта Фларыда.

Выданні хронікі

• Brut y tywysogion: or, The chronicle of the princes / Williams, John. — London: Longman, Green, Longman and Roberts, 1860. — 578 p.
• Хроніка прынцаў

Літаратура

• John Edward Lloyd, The Welsh Chronicles (London: H. Milford, 1929)
• Ian R. Jack, Medieval Wales (Ithaca: Cornell University Press, 1972)
• Thomas Jones, ed. Brut y Tywysogion: Red Book of Hergest Version (Cardiff: University of Wales Press, 1973)
• Thomas Jones, ed. Brut y Tywysogion: Peniarth MS. 20 version (Cardiff: University of Wales Press, 1952)

Спасылкі

• Пераклад часткі «Хронікі» з рукапісу Peniarth 20 Архівавана 5 сакавіка 2006. (англ.)