Юзаф Багуслаў Слушка

Юзаф Багуслаў Слушка (22 кастрычніка 1652 — 8 кастрычніка 1701) — дзяржаўны і вайсковы дзеяч Вялікага Княства Літоўскага. Лоўчы (1673—1676) і харунжы вялікі літоўскі (1676—1683), маршалак надворны літоўскі (1683—1685), кашталян троцкі (1685) і віленскі (з 1685), адначасова гетман польны літоўскі (з 1685).

Юзаф Багуслаў Слушка
Ю. Б. Слушка. Невядомы мастак, 1680
Герб «Астоя»
Польны гетман літоўскі 1685 — 1701
Папярэднік	Ян Агінскі
Пераемнік	Міхал Сервацы Вішнявецкі
Нараджэнне	22 кастрычніка 1652(1652-10-22)
Смерць	8 кастрычніка 1701(1701-10-08) (48 гадоў) Кракаў, Рэч Паспалітая
Род	Слушкі
Бацька	Багуслаў Юрый Слушка
Маці	Ганна з Патоцкіх
Жонка	Тэрэза з Гасеўскіх
Дзеці	няма
Медыяфайлы на Вікісховішчы

Трымаў Рэчыцкае (1672—1688), Пунскае, Пянянскае, Лянцкаронскае, Лятычоўскае і Азярыцкае староствы.

Біяграфія

Прадстаўнік шляхецкага роду Слушкаў герба «Астоя», сын Багуслава Юрыя, падскарбія надворнага літоўскага, і Ганны з Патоцкіх.

Падтрымліваў Яна Сабескага. У грамадзянскую вайну ў Вялікім Княстве Літоўскім спачатку падтрымаў Сапегаў, аднак пасля смерці караля і вялікага князя перайшоў у апазіцыю разам са сваім братам Дамінікам Міхалам, ваяводам полацкім, да Міхала Сервацыя Вішнявецкага і Пацеяў.

Браў удзел у шматлікіх бітвах з татарамі і туркамі ў часе кампаніяў 1673—1698, аднак не выявіў таленту вайскавода.

У шлюбе з Тэрэзай, дачкой Вінцэнта Гасеўскага нашчадкаў не пакінуў. У 1697 у гонар жонкі заклаў места Тэрэспаль.

Літаратура

• Вяроўкін-Шэлюта У. Слушкі // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — С. 597. — 792 с. — ISBN 985-11-0378-0 (т. 2), ISBN 985-11-0315-2.