Алесь Дубровіч

Алесь Дубровіч, сапр.:Аляксей Рыгоравіч Рэдзька (1910, в. Галубічы Дзісенскага пав. Віленскай губ., цяпер в. Каралевічы, Глыбоцкі раён, Віцебская вобласць — 7 лістапада 1942, Глыбоччына) — беларускі паэт.

Алесь Дубровіч
Асабістыя звесткі
Дата нараджэння	1910
Месца нараджэння	Галубічы, Дзісенскі павет, Віленская губерня, Расійская імперыя
Дата смерці	7 лістапада 1942(1942-11-07)
Месца смерці	Глыбоцкі раён, Вілейская вобласць, БССР, СССР
Грамадзянства	БНР  Польская Рэспубліка  БССР
Прафесійная дзейнасць
Род дзейнасці	паэт
Мова твораў	беларуская
Творы ў Вікікрыніцах

Біяграфія

Друкавацца пачаў у 1928 годзе (карэспандэнцыі ў газеце «Доля працы»). У 1933 годзе апублікаваны яго першы верш «Беларусь». Удзельнік 1-га нелегальнага з’езда заходнебеларускіх пісьменнікаў (Вільня, 1933). Арыштаваны польскімі ўладамі ў 1934 годзе за падпісанне і публікацыю «Дэкларацыі групы паэтаў да ўсіх пісьменнікаў Заходняй Беларусі». Два з паловай гады без суда правёў у віленскай турме на Лукішках. Палітвязні выдавалі рукапісны часопіс «Краты», дзе ён змяшчаў свае творы пад псеўданімамі Макар і Мікіта. Пасля вызвалення ў 1936 годзе узяў псеўданім «Алесь Дубровіч». Актыўна друкаваўся ў заходнебеларускіх перыядычных выданнях («Беларускі летапіс», «Калоссе»). У кастрычніку 1939 года быў дэлегатам Народнага сходу ў Беластоку. У 1940 года пасля з’яднання Заходняй Беларусі з БССР працаваў карэспандэнтам газеты «Вілейская праўда». У гады вайны ў антыфашысцкім падполлі. Быў арыштаваны ў канцы лістапада 1942 года акупацыйнымі ўладамі; расстраляны.

Дзед вядомага дудара, музыканта і майстра народных інструментаў Дзмітрыя Дзёміна.

Творы

• У кн.: Сцягі і паходні. Мн., 1965;
• Крывёю сэрца. Мн., 1967;
• Радзіме — радок і жыццё. Мн., 1986.

Ушанаванне памяці

• Помнік на месцы расстрэлу патрыётаў, непадалёк ад вёскі Галубічы.
• Адна з вуліц горада Глыбокае носіць імя Алеся Дубровіча.
• У 2012 годзе ў Глыбокім была адкрыта Алея гонару, на якой устаноўлены бюст паэта.

Крыніца

• Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. Энцыклапедычны даведнік у 10 тамах (15 кнігах). Т. 1. Абрамовіч—Кушаль. / Укладальнік Л. У. Маракоў. — Смаленск, 2003. — 480 с. — ISBN 985-6374-04-9.