Аляксандр Фаміч Коршунаў

Алякса́ндр Фамі́ч Ко́ршунаў (4 сакавіка 1924, в. Палішына, Горацкі раён — 12 ліпеня 1991) — беларускі гісторык старажытнай літаратуры, тэкстолаг, літаратуразнавец, кандыдат філалагічных навук (1956). Інвалід Вялікай Айчыннай вайны.

Аляксандр Фаміч Коршунаў
Дата нараджэння	4 сакавіка 1924(1924-03-04)
Месца нараджэння	Палішына, Аршанскі павет, Віцебская губерня, РСФСР, СССР
Дата смерці	12 ліпеня 1991(1991-07-12) (67 гадоў)
Месца смерці	Мінск, БССР, СССР
Грамадзянства	СССР
Род дзейнасці	літаратуразнавец
Навуковая сфера	літаратуразнаўства
Месца працы	Акадэмія навук Беларускай ССР
Навуковая ступень	кандыдат філалагічных навук
Альма-матар	БДУ
Прэміі	Дзяржаўная прэмія БССР імя Якуба Коласа (1980)
Узнагароды

Біяграфія

Нарадзіўся ў сялянскай сям'і. У 1941 годзе скончыў Ленінскую сярэднюю школу Горацкага раёна. У верасні 1943 г. мабілізаваны ў Чырвоную армію. У адным з баёў цяжка паранены. Пасля ампутацыі нагі дэмабілізаваны як інвалід. Скончыў БДУ (1950). Пазней вучыўся ў аспірантуры пры кафедры рускай літаратуры ЛДУ. 3 1954 працаваў у Інстытуце літаратуры АН Беларусі. У 1956 абараніў кандыдацкую дысертацыю на тэму «Афанасій Філіповіч і яго грамадска-літаратурная дзейнасць. З гісторыі грамадскай думкі на Беларусі».

Даследаваў беларускую старажытную літаратуру, вывучаў творчасць Францыска Скарыны, Сымона Буднага, Васіля Цяпінскага, царкоўна-палемічную і мемуарную літаратуру XVI—XVII стст. Апублікаваў «Баркулабаўскую хроніку» і «Лісты» Ф. Кміты-Чарнабыльскага («Помнікі старажытнай беларускай пісьменнасці», 1975), «Дзённікі» Ф. Еўлашоўскага і Я. Цадроўскага («Помнікі мемуарнай літаратуры Беларусі XVI ст.», 1983). Складальнік «Хрэстаматыі па старажытнай беларускай літаратуры» (1959), адзін з аўтараў «Гісторыі беларускай дакастрычніцкай літаратуры» (т. 1, 1968).

Лаўрэат Дзяржаўнай прэміі Беларусі імя Якуба Коласа 1980 г. за ўдзел у двухтомным даследаванні «Гісторыя беларускай дакастрычніцкай літаратуры» і «Гісторыя беларускай савецкай літаратуры». У 1991 г. А. Ф. Коршунаў быў узнагароджаны медалём Францыска Скарыны.

Узнагароды

• Лаўрэат Дзяржаўнай прэміі БССР
• Ганаровая грамата Вярхоўнага Савета БССР
• Ордэн Айчыннай вайны II ступені.
• Медаль Францыска Скарыны.

Літаратура

• Памяць: Гіст.-дакум. хроніка Мінска. У 4 кн. Кн. 1-я. — Мн.: БЕЛТА, 2001. — 576 с.: іл. — ISBN 985-6302-33-1.
• Ліўшыц, Уладзімір. Ён лёгка адчуваў сябе сярод стагоддзяў // Раскопкі вакол горацкага «Парнаса». Літаратуразнаўчыя нарысы — Горкі: аддзел культуры Горацкага райвыканкама, 2001. — С. 179—183. ISBN 985-6120-44-6
• Памяць. Гіст.-дакум. хроніка. Горацкі раён. — Мн.: 1996. С.556.
• Коршунаў Аляксандр Фаміч // Энцыклапедыя гісторыі Беларусі. У 6 т. Т. 4: Кадэты — Ляшчэня / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 1997. — С. 241. — 10 000 экз. — ISBN 985-11-0041-2.

Спасылкі

• Коршунаў Аляксандр Фаміч (нявызн.). Беларусь у асобах і падзеях. Нацыянальная бібліятэка Рэспублікі Беларусь.