Баляслаў Антонавіч Скрамблевіч

Баляслаў Антонавіч Скрамбле́віч (нар. 2 снежня 1945, г. п. Адэльск, Гродзенскі раён, БССР) — беларускі мастак.

Баляслаў Антонавіч Скрамблевіч
Дата нараджэння	2 снежня 1945(1945-12-02) (78 гадоў)
Месца нараджэння	Адэльск, Адэльскі сельсавет, Гродзенскі раён, Гродзенская вобласць, БССР, СССР
Род дзейнасці	мастак
Месца працы	Мінскі мастацка-вытворчы камбінат[d]
Вучоба	Мінскае мастацкае вучылішча імя А. К. Глебава (1974) Беларускі дзяржаўны тэатральна-мастацкі інстытут (1979)
Член у	Беларускі саюз мастакоў

Біяграфія

З сялянскай сям’і. Брат Мар’яна Скрамблевіча. Скончыў СШ у Адэльску. Працаваў у Гродне.

У 1969—1974 гадах вучыўся ў Мінскім мастацкім вучылішчы, у 1974—1979 гадах — на факультэце дэкаратыўна-прыкладнога мастацтва (аддзяленне мастацкага металу) Беларускага тэатральна-мастацкага інстытута. З 1979 года працуе ў Мінскім мастацка-вытворчым камбінаце. Член Беларускага саюза мастакоў з 1987 года.

Творчасць

Выконвае дэкаратыўныя кампазіцыі з металу з уключэннем шкла, каваныя брамы, краты, падсвечнікі, шрыфтавыя тэксты назваў станцый метро, устаноў, інтэр’еры, дробную пластыку.

Сярод твораў: інтэр’еры станцыі метро «Трактарны завод», гасцініцы «Беларусь», Рэспубліканскага Дому шлюбаў, рэзідэнцыі ўрада РБ, рытуальнай залы Дома афіцэраў у Мінску і інш.

У выставах удзельнічае з 1978 (у Беларусі, Літве, Латвіі, Эстоніі, Расіі). Выстаўляліся творы дэкаратыўнай пластыкі «Ландыш», «Ранак, поўдзень, вечар», «Хай заўсёды будзе сонца», «Вясновы промень», «Нараджэнне новай формы», «Лік» і інш. Аўтар шматлікіх публікацый на тэмы дэкаратыўна-прыкладнога мастацтва.

Сям’я

Мае дачку Валерыю, беларускага лінгвіста, выкладчыцу кафедры замежных моў Міжнароднага ўніверсітэта «МІТСО».

Літаратура

• Скрамблевіч Баляслаў Антонавіч // Пяткевіч А. М. Людзі культуры з Гродзеншчыны: Даведнік.. — Гродна: ГрДУ, 2000. — 356 с.