Банак (народ)
Банак (саманазвы: Bana'kwut, Panaiti, літаральна "людзі вады") — індзейскі народ, карэнныя жыхары ЗША. У наш час жывуць разам з паўночнымі шашонамі ў Айдаха. Агульная колькасць (2010 г.) - 89 чал.
| Банак (Bana'kwut) | |
| |
Фота 1895 г.
| |
| Агульная колькасць | 89 (2010 г.) |
|---|---|
| Рэгіёны пражывання | ЗША |
| Мова | паўночная паютэ |
| Рэлігія | анімізм, хрысціянства |
| Блізкія этнічныя групы | паютэ |
Гісторыя
правіцьПадобна да іншых паютэ, банак паходзяць з тэрыторыі Вялікага Басейна, які маглі пакінуць разам з паўночнымі шашонамі. Некаторыя лічаць, што першае апісанне банак было зроблена ў 1805 г. падчас экспедыцыі Льюіса і Кларка, у нататках якой узгаданы "індзейцы парваных макасінаў". Аднак першае канкрэтнае апісанне было зроблена толькі ў 1829 г. У 1833 г. яны насялялі раку Партнёф у Айдаха. У 1853 г. губернатар Вашынгтона паведамляў пра групу банак на ўсходзе Айдаха, якая нядаўна перасялілася з-за заходніх гор у пошуках выратавання ад воспы і іншых індзейцаў.
Да канца 1860-х гг. банак былі інтэграваны з паўночнымі шашонамі, хаця захоўвалі адрозную мову. У 1863 г. і 1869 г. разам з шашонамі падпісвалі мірныя пагадненні з ЗША і ў выніку былі пераселены ў рэзервацыю. Аднак большасць конных банак на чале з правадыром Бізонавым Рогам хутка пакінула вылучанае месца жыхарства і працягвала незалежны лад жыцця. Скарачэнне статкаў дзікіх жывёл ў 1870-х гг. выклікала голад сярод прадстаўнікоў гэтай групы, таму Бізонавы Рог аб'яднаўся з паўночнымі паютэ для нападаў на амерыканскіх перасяленцаў. У чэрвені — жніўні 1878 г. амерыканскія салдаты і добраахвотнікі вялі ваенныя дзеянні супраць банак на чале з Бізонавым Рогам. Яны скончыліся паражэннем індзейцаў. Рэшткі банак былі пераселены ў 2 рэзервацыі ў Айдаха і Вашынгтоне.
У 1901 г. агульная колькасць банак дасягала 513 чалавек, аднак яны ўжо былі значна асіміляваны шашонамі. Далейшай інтэграцыі з шашонамі садзейнічала стварэнне адзіных выбарных органаў кіравання.
Традыцыйная культура
правіцьХаця ў XIX ст. банак займаліся конегадоўляй і палявалі на бізонаў, важнымі заняткамі для іх заставаліся рыбалоўства і збор цыцаніі. Яны вандравалі невялікімі сямейнымі групамі ўздоўж рэк, аб'ядноўваліся для супольных святаў, паляванняў і войн. Да перасялення ў рэзервацыю жылі ў травяных буданах і скураных тыпі. Карысталіся лукам, стрэламі, дзідамі, каменнымі нажамі.
Вопратка паходзіла на вопратку паўночных паютэ. Плялі з раслінных валокнаў фартухі, кашулі, понча, выраблялі з футра трусоў плашчы, са скур дзікіх жывёл — штаны. Для вырабу адзення таксама выкарыстоўвалі коўдры, што выменьвалі ў амерыканскіх гандляроў на футра.
Фальклор уключае міфы і казкі пра стваральніка свету ваўка Эсу, трыкстэра каёта Эюпэ, карлікаў-людаедаў нінумбі, вадзяных духаў.
Спасылкі
правіць
|
Банак (народ) на Вікісховішчы |
|---|