Вікіпедыя

Дом па Першамайскай вуліцы, 31 (Магілёў)

Магілёў
(Пасля перасылкі з Габрава (рэстаран))

Дом па Першамайскай вуліцы, 31 (таксама вядомы як «кітайская сцяна») — жылы дом у гістарычным цэнтры Магілёва. Пабудаваны ў 1981 г. з цэглы паводле праекта архітэктараў І. Фралова і Г. Борахава[1], распрацаваным у 1973—1978 гадах[2].

Дом па Першамайскай вуліцы, 31
Краіна
Месцазнаходжанне
Архітэктар Ігар Іванавіч Фралоў
Лагатып Вікісховішча Медыяфайлы на Вікісховішчы

У тарцавой частцы, якая выходзіла на вул. Будзённага, размяшчаўся Дом архітэктара, які злучаўся галерэяй з Магілёўграмадзянпраектам. Цяпер памяшканні займае БРСМ.

Архітэктура правіць

Размешчаны на значнай адлегласці ад лініі забудовы вуліцы (каля 120 м), што ўтварае пешаходную зону, добраўпарадкаваную газонамі і дэкаратыўнымі басейнамі. Складаецца з некалькіх аб’ёмаў. Першы (9-павярховы) галоўным падоўжаным фасадам (да 200 м) выходзіць на вул. Першамайскую, другі (12-павярховы) злучаны з тарцом першага, выходзіць на вул. Будзённага. Да галоўнага фасада 9-павярховага аб’ёму далучаны два 2-павярховыя аб’ёмы — магазін і рэстаран «Габрава». У выніку ствараецца прасторава-развітая кампазіцыя, якая арганічна ўпісваецца ў навакольную забудову. У інтэр’еры рэстарана — дэкаратыўныя пано (разьба па дрэве)[1].

 
2-павярховы аб’ём магазіна

Першыя 2 паверхі 9-павярховага аб’ёму суцэльнага зашклення з чляненнем у выглядзе пілонаў. Тут размешчаны розныя ўстановы і прадпрыемствы бытавога абслугоўвання. Астатнія 7 паверхаў жылыя, вырашаны адзіным архітэктурным прыёмам: рознай даўжыні балконы з вертыкальнымі бакавымі перагародкамі. Спалучэнне раўнамернага рытму аконных праёмаў і балконаў надае галоўнаму фасаду аб’ёмнасць і цэласнасць. Сцены абліцаваны каляровай пліткай, што стварае насычаную гаму фасада. У апрацоўцы цокаля выкарыстаны граніт. У доме 228 кватэр. Кватэры арыентаваны на абодва бакі дома, балконы з боку галоўнага і дваровага фасадаў. Ліфты вынесены за габарыты дома, убудаваны ў спецыяльныя шахты[1].

Рэстаран «Габрава» правіць

Рэстаран «Габрава», названы ў гонар балгарскага горада-пабраціма Магілёва, адкрыты ў 1980 годзе. Гандлёвая плошча складае 529 м². Адначасова можа абслужыць 220 чал. У савецкія часы ўвечары іграў вакальна-інструментальны ансамбль. Інтэр’еры ўпрыгожаны разнымі драўлянымі пано (мастак Г. Данілавіч)[3].

Зноскі

  1. ↑ а б в Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1986. — Магілёўская вобласць. — 408 с., іл.
  2. ↑ Фралоў Ігар Іванавіч // Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.
  3. ↑ «Габрово» // Могилёв. Энциклопедический справочник (руск.) / Гл. редактор И. П. Шамякин. — Мн.: БелСЭ им. П. Бровки, 1990. — 472 с. — ISBN 5-85700-028-9.

Літаратура правіць

Спасылкі правіць

Узята з "https://be.wikipedia.org/w/index.php?title=Дом_па_Першамайскай_вуліцы,_31_(Магілёў)&oldid=3609828#Габрава"